Кавказ биосфернэ заповедникым цIыф уцупIэу иIэ чIыпIэхэм мышъэхэр нахьыбэу къяуалIэхэу аублагъ.

Биологическэ шIэныгъэхэмкIэ докторэу, профессорэу Анатолий Кудактиным заповедникым исайт къыщитыгъэ къэбарымкIэ, пхъэшъхьэ-мышъхьэ ыкIи цумпэ лъэпкъ зэфэшъхьафхэм ялъэ­хъан мышъэхэр ыкIи нэмыкI псэушъхьэхэр ахэм бэу къякIуа­лIэх.

Ижъырэ адыгэ чъыгхатэхэу заповедникым ыубытырэ чIы­налъэм итхэм ыкIи къушъхьэхэм ахэтхэм мы уахътэм пхъэшъхьэ-мышъхьэхэр къатых. Джа чIыпIэхэр арых заповедникым иIофышIэхэм анахьыбэу мышъэ­хэр зэуалIэхэу агъэунэфыгъэхэр – къужъхэр ашхынхэу макIох.

Анатолий Кудактиным къызэриIорэмкIэ, къужъыр мышъэ­хэми, нэмыкI псэушъхьэхэми акIас.

Джащ фэдэу кордонэу Лаурэ ихьакIэхэм бэмышIэу алъэгъугъэх къякIугъэ мышъэхэр ыкIи сурэтхэр атырахыгъэх мышъэ анэу ыкIи ищырхэу къужъхэр зышхы зышIоигъоу къекIолIагъэ­хэм.

Кавказ биосфернэ заповедникым ипресс-къулыкъу къызэритырэмкIэ, анахьэу къиныгъо хафэрэр Фыщт иуцупIэу хыкъу­мэу Зеркальное зыфиIорэм ыдэжь щыгъэпсыгъэр ары. Мыщ электричествэр къызэкIолIэрэ къэшIыхьагъэхэр Iуагъэуцуагъэх палаткэу щытхэм псэушъхьэ Iэлхэр къямыкIолIэнхэм пае.

ИкIыгъэ тхьамафэм, мэфэку чэщым, палатки 4 ащ мышъэм щызэIитхъыгъ. Ышхын зи ыгъо­тыгъэп, гитарэу чIэлъым хишхы­кIыгъ.

ЭлектрокъэшIыхьагъэм ыкIоцI палаткэр итыгъэмэ, ащ фэдэ хъугъэ-шIагъэр къэхъущтыгъэп. УцупIэр зэжъущэу алъыти, зе­кIохэм нэмыкI чIыпIэ къыха­хыгъ. Джы палаткэхэр зэтебгъэуцожьышъунхэу щытэп.

Ащ фэдэ зэIукIэгъухэр мы­хъун­хэм пае Кавказ заповедникым иIофышIэхэм хьакIэхэм макъэ арагъэIу афамыгъэнэфэгъэ чIыпIэхэм къащыуцухэ зэрэмыхъущтымкIэ, пчыхьэм сыхьатыр 10 ужым ямыгъусэхэу къамыкIухьанэу. ЭлектрокъэшIыхьагъэхэр зыIутхэм ахэм акIоцI дэмыкIынхэу араIо. Ащ фэдэ къэшIыхьагъэхэр зыдэщымыIэхэм хэкIыр ыкIи къялыжьыгъэ шхыныгъохэр къаIуагъанэ хъущтэп. Мы зэпстэуми псэу­шъхьэ­хэр, мышъэхэр къаращалIэх.

Заповедникым ипресс-къу­лыкъу къызэритырэмкIэ, мыхэм анэмыкIэу мэхьанэшхо яI гъогу­уанэхэу мэфэ пчъагъэхэм ате­лъытагъэхэм уахътэу афыхэхыгъэр агъэцэкIэным – чэщ къызыхъукIэ якIон щагъэтыным. Лъэс гъогухэм арыкIохэ зыхъу­кIэ, бырсыр тIэкIу къызпагъэIу­кIымэ нахьышIу – орэд къаIон е шъуинхэ, лъэшэу гущыIэнхэ фае псэушъхьэхэм ашIэнэу цIы­фыр къызэрэкIорэр, щынэнхэу. Сурэтхэр Кавказ биосфернэ заповедникым ипресс-къулыкъу иех.