Адыгэ Республикэм и Мафэ фэгъэхьыгъэ концертэу «Адыгэ хэку» зыфиIорэр Мыекъуапэ щыкIощт.

Пчыхьэзэхахьэр Адыгэ Рес­публикэм и Къэралыгъо филармоние и Камернэ музыкальнэ зэхэхьапIэ щызэхащэщт.

Республикэм ичIыопс дахэ, тилъэпкъ шэн-хабзэхэм, адыгэхэм яфольклор, хэкум икъэралыгъо гъэпсыкIэ игъэпытэн, нэмыкIхэм афэгъэхьыгъэ орэдхэр, музыкальнэ произведениехэр зэхахьэм щагъэжъынчыщтых.

Жэнэ Къырымызэрэ Сэмэгу Гощнагъорэ зэдаусыгъэ орэдэу адыгэхэм яшэн-хабзэхэм яхьы­лIагъэр, КIыргъ Юрэ иорэдэу лъэныкъо гупсэм фэгъэхьыгъэр, Анзорыкъо Вячеслав, Хъупэ Мурат, нэмыкIхэм аусыгъэхэр зэхахьэм щыIущтых.

Камернэ музыкальнэ зэхэхьапIэм артист цIэрыIохэм ныбжьыкIэхэм, цIыфхэм агу рихьырэ орэдхэр къыщаIощтых. Адыгэ Республикэм инароднэ артисткэу Нэгъой Маринэ, дунэе зэнэкъо­къухэм ялауреатхэу Теуцожь Бэллэ, Сергей Трутневым Адыгеим якомпозиторхэм аусыгъэ орэдхэр зэхытагъэхыщтых.

Дунэе зэнэкъокъум илауреатэу Сергей Пособиловым флейтэмкIэ произведениехэр къыригъэIощтых. Дунэе фестиваль-зэнэкъокъум «Гран-при» зыфиIорэ шIухьафтын шъхьаIэр къыщызыхьыгъэ Набэкъо Бэлэ фортепианэмкIэ артистхэм къа­дежъыущт.

Лектор-искусствоведэу Татьяна Резниченкэм изэфэхьысыжьхэм къащыхигъэщыгъ Адыгеим икомпозиторхэм аусыгъэ произведениехэу Урысыем, IэкIыб хэгъэгухэм къащаIохэрэр концерт программэм зэрэхэтхэр.

Адыгэ Республикэм и Мафэ фэгъэхьыгъэ зэхахьэр чъэпыогъум и 20-м филармонием щыкIощт. Джырэ уахътэ артистхэм загъэхьазыры. ЕмтIылъ Нурбый.