Къэзэкъхэм ягукъэкIыжь
Мыекъопэ районым ипсэупIэу Дахъом шIэжь зэхахьэ щыкIуагъ.
Граждан заом илъэхъан лажьэ зимыIэ къэзэкъи 120-рэ ЧОН-м идзэкIолIхэм якIодылIагъ. Ащ фэгъэхьыгъэ шъыгъо-шIэжь зэхахьэр илъэс къэс зэхащэ.
Мыекъопэ къэзэкъхэм якъутамэ хэтхэр, къэзэкъхэм ядзэ-патриотическэ клубэу «Заставэм» иныбжьыкIэхэр, динлэжьхэр, нэмыкIхэри шIэжь зэхахьэм хэлэжьагъэх. 2014-рэ илъэсым саугъэт-къащыр гъэуцугъэным къэзэкъхэр кIэщакIо фэхъугъагъэх.
Мыекъопэ къэзэкъ къутамэм ипащэу Александр Даниловым къызэриIуагъэу, илъэси 101-кIэ узэкIэIэбэжьмэ, къэзэкъхэм къяхъулIэгъэ тхьамыкIагъор тщыгъупшэрэп. Тарихъым инэкIубгъохэм къагъэлъагъо лIэужхэм язэпхыныгъэхэр щыIэныгъэм зэрэщыпытэхэрэр. Тинепэрэ кIэлэцIыкIухэм ашIэн фае тарихъ гъогоу къэткIугъэр зыфэдэр.
Динлэжьэу Николай зэхахьэр зэрищагъ. А чIыпIэм щаукIыгъэхэ къэзэкъхэм зы такъикъэ афэшъыгъуагъэх, къэгъагъэхэр саугъэтым кIэралъхьагъэх, шэф остыгъэхэр тхьэлъэIупIэм дэжь агъэуцугъэх. Зэхахьэм дин шэн-хабзэхэр щызэрахьагъэх. Екатерина Загорулько.