Урысыем и Генеральнэ консулэу Армением икъалэу Гюмри щыIэ Къэндаур Руслъан Исмахьилэ ыкъом мы мафэхэм ыныбжь илъэс 60 хъугъэ.

Руслъан илIакъокIэ Адыгеим ит къуаджэу Блащэпсынэ щыщ. 1961-рэ илъэсым Iоныгъом и 4-м къэхъугъ. 1984-рэ илъэсым Ростов дэт инженернэ-псэо­лъэшI институтыр, 1995-рэ илъэсым Урысыем и МИД и Дипломатическэ академие къы­ухыгъ. Инджылызыбзэр ыкIи ивритыбзэр дэгъоу ешIэх.

2006 — 2010-рэ илъэсхэм Урысыем и МИД ипредставительствэу Мыекъуапэ щыIэм ипэщагъ. 2010-рэ илъэсым къыще­гъэжьагъэу 2016-рэ илъэ­сым нэс Урысыем и Посольствэу Израиль щыIэм исоветникыгъ. 2019-рэ илъэсым Урысыем и Посольствэу Къыблэ Осетием щыIэм исоветникэу Iоф ышIагъ.

Урысые Федерацием IэкIыб къэралыгъохэм яIофхэмкIэ и Министерствэ иунашъокIэ 2020-рэ илъэсым тыгъэгъазэм и 17-м Армением икъалэу Гюмри щы­Iэм Урысыем и Генеральнэ консулэу Къэндаур Руслъан Исмахьилэ ыкъор агъэнэфагъ, апэрэ класс зиIэ советник. Руслъан Исмахьилэ ыкъом гъэхъагъэхэр ышIыхэзэ ыцIэ лъагэу зэрэIугъэм икъоджэгъу­хэр, иныбджэгъухэр ыкIи иIа­хьыл гупсэхэр рэгушхох. Ахэм ащыщхэр Руслъан фэгъэхьы­гъэу къыддэгощагъэх.

Терзиян Игорь Сетрак ыкъор, УФ-м и МИД ипредставительствэу Краснодар щыIэм иапэрэ секретарь:

— 1987-рэ илъэсым къыщегъэжьагъэу Руслъан Исмахьилэ ыкъор сэшIэ. Непэ къызнэсыгъэм ныбджэгъуныгъэ тазфагу дэлъ. Руслъан сэ зэрэсшIэрэр гукIэгъулэу, цIыф хьалэлэу, зафэу ары. Ренэу ыIорэм тет, игущыIэ епцIыжьырэп, сыд фэдэрэ Iоф­шIэн ыгъэцэкIагъэми, хэшIыкI фыриI, икъоу щыгъуаз. 1992-рэ илъэсым къыщегъэжьагъэу АР-м и Правительствэ иминистерствэ зэфэшъхьафхэм тащызэдэлэ­жьагъ. Нэужым Москва дипломатическэ академием щеджэнэу кIуагъэ. Сэри ащыгъум Iоф сшIэзэ Урысыем IэкIыб къэралыгъохэм яIофхэмкIэ и Министерствэ и ГИМО сыщеджэщтыгъэ. Сессиер къэсэу Москва сызыкIокIэ Руслъанрэ сэрырэ ренэу тызэрэлъэгъущтыгъ. Еджэныр къыухи, МИД-м игупчэ аппаратэу Москва щыIэм тIэкIурэ Iоф щишIагъэу, Израиль командировкэ агъакIо. Ащ илъэ­си 6-рэ къыщыIагъэу къызегъэ­зэжьым, Урысыем и МИД ипредставительствэу Мыекъуапэ щыIэм пэщэныгъэ дызэри­хьагъ. Ащыгъум илъэси 5-рэ представительствэм Iоф щызэдэтшIагъ. Ащ ыуж консулэу командировкэ Израиль, нэужым Къыблэ Осетием ащыIагъ. Гъэ­рекIо къыщегъэжьагъэу Армением икъалэу Гюмри Урысыем и Генеральнэ консулэу Къэндаур Руслъан Iоф щешIэ.

Непэ къызнэсыгъэм тызэдэгущыIэ, ныбджэгъуныгъэу тазыфагу илъыр ренэу лъытэгъэкIуа­тэ. СызэрэщыгъуазэмкIэ, Рус­лъан Армениер лъэшэу ыгу рехьы. Мыщ щыпсэухэрэм шъхьэ­кIафэ къызфаригъэшIын ылъэкIыгъ. ШъхьэкIэфагъэ къырахы, алъытэ. Янэ-ятэхэми, иунагъуи бэшIагъэу сащыгъуаз. Яни, яти шъхьэкIафэ зиIэ цIыфых, республикэм культурэм илъэныкъохэм ащылэжьагъэх. Ышыпхъу АР-м цIыфхэр социальнэу къэухъумэгъэнхэмкIэ и Министерствэ Iоф щешIэ. Ишъхьэ­гъусэу Бэллэ цIыфышIу, ипшъэшъэжъыеу Дианэ я 10-рэ классым щеджэ. Унэгъо зэгурыIожь, шIурэ, дахэрэ нэмыкI япIолIэшъущтэп.

Ныбэ Руслъан, АР-м псэолъэшIынымкIэ и Министерствэ игъэIорышIапIэ ипащ, Рус­лъан иныбджэгъушIу:

— Руслъан, Мыекъуапэ игурыт еджапIэу N 5-р къыухыгъ. Нэужым Руслъанрэ сэрырэ Ростов дэт инженернэ-псэ­олъэшI институтым илъэси 5-рэ тыщызэдеджагъ. Институтым дзэ кафедрэ хэтыгъ, тIуми лейтенант звание тиIэу къэтыухыгъ. Институтым ыуж Адыгпромстроим тIуми тыIухьи, мастерэу Iоф тшIагъэ. Ащ ипащэу ХъутIыжъ Аслъан непэ къызнэсыгъэм тищысэтехыпI, шIукIэ тыгу илъ. Адыгэ Республикэр загъэпс лъэхъаным IэкIыб къэралыгъо­хэм яIофхэмкIэ Министерствэм иакадемие Руслъан еджакIо агъэкIуагъ. Ащ ыуж министерствэм епхыгъэу илъэс зэкIэлъы­кIохэм ищытхъу аригъаIозэ дипломатэу Iоф ешIэ. ЦIыфыныгъэшхо хэлъ, исэнэхьат хэшIыкIышхо фыриI, дипломат къулыкъум дэгъу дэдэу щы­гъуаз. 1979-рэ илъэсым къыщегъэжьагъэу Руслъан сэшIэшъ, иныбджэгъуныгъэкIэ зымафи сыгу джэн­джэш къихьагъэп. Изыгъэпсэфыгъо мафэхэм Мыекъуапэ къы­зыкIокIэ ренэу тызэIокIэ, къэбархэмкIэ тызэдэгуащэ. ЗэгурыIожь унагъо щапIугъ, янэ-ятэхэри ышыпхъуи дэгъоу сэшIэх. Мы илъэсым Iоныгъом и 4-м Руслъан ыныбжь илъэс 60 хъугъэ. Псауныгъэ пытэ иIэу, иIахьыл гупсэхэм адатхъэу щыIэнэу фэсэIо.

ЖэнэлI Аслъан, монополием пэшIуекIогъэнымкIэ федеральнэ къулы­къум АР-мкIэ и ГъэIорышIапIэ ипащэ игуадз, Руслъан иныбджэ­гъушIу: — Руслъан Ростов дэт инженернэ-псэолъэшI институтыр къызеухым, Мыекъуапэ и ПМК мастерэу Iоф щишIэнэу къызэкIор ары нэIуасэ тызщызэфэхъугъэр. Ащ къыщегъэжьагъэу тызэныбджэгъу.

Нэужым «Адыгпромстроим» иIофшIэн щылъигъэкIотагъ. Ащ ыуж IэкIыб экономикэ зэпхыныгъэм и Комитет Мыекъуапэ зыщагъэпсым, МИД-м иакадемиеу Москва дэтым еджакIо кIуагъэ. Ащ ыуж министерствэм ипосолэу илъэс пчъагъэ хъу­гъэу Iоф ешIэ. Непэ къызнэсыгъэм тызэныбджэгъу. Руслъан сэ зэрэсшIэрэр зыпшъэ укIон умылъэкIын цIыф къызэрыкIоу ары. ЦIыфыгъэшхо ыкIи зэфагъэ хэлъ, ыIорэм епцIыжьырэ цIыфхэм зыкIи ащыщэп. Уиныб­джэгъункIэ фэдэ щыIэп, шъхьэ­кIэфэныгъэр къылэжьыгъ. Иуна­гъуи, янэ-ятэхэри ежь фэдэу цIыфышIух, Iэдэбныгъэшхо ахэлъ. IэкIыбым щыIэ хъумэ телефонкIэ ыкIи скайпымкIэ тызэдэгущыIэ. БэмышIэу имэфэкI ехъулIэу Мыекъуапэ къэ­кIогъагъ, сигуапэу сыфэгу­шIуагъ. Ныбджэгъухэм ацIэкIэ гъэзетыр къызфэзгъэфедэзэ Руслъан сы­фэлъаIо сшIоигъу шIоу щыIэр игъогогъоу, янэ-ятэхэр бэрэ иIэнхэу, ежьри бэгъашIэ хъунэу.

Бэлокъо Аслъан, Адыгэ республикэ общественнэ шIушIэ организациеу «Блащэпсын » зыфиIорэм ипащэ игуадз:

— Руслъан ятэу Исмахьилэ цIыф еджагъэу, гъэшIуагъэу, шъхьэкIэфэныгъэр къэзылэжьыгъэу Блащэпсынэ къыдэкIыгъэ­хэм зэу ащыщ. Блащэпсынэ гурыт еджапIэм директорэу тетыгъ, сэри сыригъэджагъ. Нэужым Мыекъуапэ къызэ­кIожьым, АР-м икультурнэ кIэн­хэр къэухъумэгъэнхэм ыкIи гъэфедэгъэнхэмкIэ Комитетым изэхэщэн кIэщакIо фэхъугъ ыкIи апэрэ пащэу иIагъэр ежь Исмахьил ары. ШIушIэ организациер зызэхэтщагъэм къыщыублагъэу чанэу къыхэлажьэ. Ежьыр тарихълэжь бэлахь. Къуаджэм фэгъэхьыгъэу тхылъ къыдигъэкIыгъ «Путь надежды» ыIоу. Общественнэ IофшIэнхэм чанэу ахэлажьэ, политик. ИкIалэу Руслъани ятэ илъагъо рэкIо, блащэпсынэхэм тырэгу­шхо ащ фэдэ кIэлэ гъэсагъэ къызэрэтхэкIыгъэм фэшI. Цыхьэ фашIи, илъэс пчъагъэ хъугъэу ищытхъу аригъаIозэ посолэу чIыпIэ зэфэшъхьафхэм Iоф ащешIэ. Тыдэ щыIэми янэ-ятэ­хэр, ичIыпIэгъухэр щыгъупшэ­хэрэп, ишIуагъэ арегъэкIы. Дипломат IофшIэныр къыухэу, Мыекъуапэ къызыкIожьыкIэ Руслъан тыщэгугъы ятэ фэдэу шIушIэ организацием зыкъыфигъэзэнэу, ынаIэ тыригъэтынэу. Блащэпсынэ щыщхэм ацIэкIэ Руслъан ныбжь дахэ иIэ зэрэ­хъугъэмкIэ тыфэгушIо, игъогу зэIухыгъэу, цIыфхэм шъхьэ­кIафэу къыфашIырэм къыщымыкIэу, игъэхъагъэхэм ахигъа­хъозэ ыпэкIэ лъыкIотэнэу тыфэлъаIо.

КIАРЭ Фатим.