Газыр атезыгощэрэ станциеу псэупIэу Краснооктябрьскэм дэтым игъэкIэжьын тегъэпсыхьэгъэ тхылъхэм Урысыем икъэралыгъо экспертизэ шъхьаIэ ахэплъагъ ыкIи къадыригъэштагъ.

Мыекъопэ районым щыпсэухэрэм газыр аIэкIэгъэхьэгъэнымкIэ зэбгырыщыпIэр зыхэ­хьэрэ проектыр 2021 — 2025-рэ илъэсхэм Адыгэ Республикэм ипсэупIэхэм газыр зэралъагъэ­Iэсыщт программэм хэт, сомэ миллиарди 3-м ехъурэ инвестициехэр ащ халъхьанэу щыт. 2020-рэ илъэсым ичъэпыогъу Адыгеим и ЛIышъхьэу КъумпIыл Муратрэ ПАО-у «Газпромым» иправление итхьаматэу Алексей Миллеррэ а тхылъым кIэтхэжьыгъагъэх.

Урысыем икъэралыгъо экспертизэ шъхьаIэ къызыдыри­гъэштэгъэ проект документацием газрыкIопIэ-хэщыпIэрэ автоматизированнэ газ станциерэ поселкэу Краснооктябрьскэм щыгъэпсыгъэнэу къыщыдэ­лъытагъ.

ЧэзыуитIукIэ IофшIэнхэр зэхащэщтых. Апэрэ чэзыум сыхьатым къыкIоцI газ кубическэ метрэ мин 51-рэ къэзытыщт автоматизированнэ газ станцием иплощадкакIэ агъэпсыщт, газрыкIуапIэу щыIэм автоматизированнэ газ станциякIэр рапхыщт. ДжырэкIэ газ кубическэ метрэ мини 10 къэзытырэ газ станцием ар къыгуашIы­хьащт. ЯтIонэрэ чэзыум къыдыхэлъытагъэу автоматизированнэ газ станциякIэм километри 10 зикIыхьэгъэ газрыкIуапIэр къыращэлIэщт.

Урысыем икъэралыгъо экспертизэ шъхьаIэ ипресс-къулыкъу къызэритыгъэмкIэ, гъогоу щыIэхэмкIэ ыкIи агъэпсыщтхэмкIэ автомобильхэр газ станцием екIолIэнхэ алъэкIыщт.