Шъолъыр гъэIорышIэнымкIэ Гупчэм еджапIэхэм шхын стырэу щаратырэм епхыгъэ IофыгъомкIэ республикэм щыпсэухэрэм зыкъыфагъазэу зэп къызэрэхэкIыгъэр. Анахьэу етIани илъэсыкIэ еджэгъур зыщырагъэжьэжьыгъэм ехъулIэу анахь зигъо Iофыгъохэм ащыщэу ар къэуцугъ.

КупитIумэ: илъэси 7-м къыщыубла­гъэу илъэс 12 зыныбжьыхэмрэ илъэс 12-м къыщегъэжьагъэу ащ шIокIыгъэхэмрэ апае мэфипшIым телъытэгъэ менюм ипроект зэхэзыгъэуцуагъэхэр Мыекъопэ къэралыгъо технологическэ университетым гъомылапхъэхэм ятехнологиерэ кIэлэцIыкIухэм ягъэшхэн изэхэщэнрэ афэгъэзэгъэ кафедрэр ары.

«Менюм изэхэгъэуцон хэлэжьагъэх кафедрэм истудентхэу «Гъомылапхъэхэм ятехнологиерэ цIыфхэм ягъэшхэн изэхэщэнрэ» зыфиIорэ сэнэхьатым феджэхэрэр – магистрантыр Къудайнэт Саида, бакалаврхэр Абрэдж Аннетэрэ Алексей Студеникинымрэ. Студентхэр а IофшIэным къызкIыхагъэлэжьагъэхэр ахэм теориемкIи практикэмкIи шIэныгъэ яIэшъ ары, курсовой ыкIи дипломнэ IофшIэнхэмкIи, сэнэхьатэу зэрылэжьэщтхэмкIи ар къызфагъэфедэн алъэ­кIыщт», — еIо мы кафедрэм ипащэу, техническэ шIэныгъэхэмкIэ докторэу, доцентэу Хьаткъо Зурет.

КIэлэеджакIохэм пчэдыжьым, щэджагъом ыкIи щэджэгъоужым ашхыщтхэу зэхагъэуцуагъэхэм мы къыкIэлъыкIохэ­рэр ахагъэхьагъэх: пчэдыжьышхэм —кашэ, адыгэ къуай, тхъу, щай е какао; щэджэгъуашхэм: салатхэр, лэпсхэр, «ятIонэрэ» зыфэтIорэ шхын стырхэр, пхъэшъхьэ-мышъхьэхэм ахэжъукIыгъэ компотхэр; щэджэгъоужым — щхыу лъэпкъхэр, булочкэхэр, пхъэшъхьэ-мы­шъхьэхэр. Менюхэр зэкIэ къыздахыгъэр зэлъашIэрэ шIэныгъэлэжьэу, техническэ шIэныгъэхэмкIэ докторэу, профессорэу М. П. Могильнэм итхылъэу кIэлэеджа­кIохэм ягъэшхэн фэгъэхьыгъэр ары.

«КIэлэеджакIохэм ашхыщтым епхыгъэ IофшIэным къыхэдгъэлэжьагъэх кафедрэм Iоф щызышIэхэрэм ямызакъоу ны-тыхэри. Роспотребнадзорым АдыгеимкIэ и ГъэIорышIапIэ менюр ыуплъэ­кIугъ ыкIи игъоу ылъэгъугъ», — къы­Iуагъ Хьаткъо Зурет.

Ны-тыхэм хабзэм къаритыгъэ фитыныгъэ яI гъэсэныгъэ зыщарагъэгъотырэ организациехэм ащеджэхэрэм арагъэшхырэр ауплъэкIунэу. ЩыкIагъэ горэ къыхэзыгъэщыхэрэм апае «линие плъы­рыр» щыI. Iоныгъом и 6-м къыщыублагъэу Iоныгъом и 17-м нэс РоспотребнадзорымкIэ ГъэIорышIапIэу Адыгеим щыIэм иIофышIэхэм консультациехэр зэхащэщтых. Ащ нэмыкIэу Адыгэ Рес­публикэм гъэсэныгъэмрэ шIэныгъэмрэкIэ и Министерствэрэ «Волонтеры Адыгеи» зыфиIорэмрэ зэгъусэхэу гъэсэныгъэ зыщарагъэгъотырэ организациехэу рес­публикэм итхэм гъэшхэныр зэращызэхэщагъэмкIэ цIыфхэм яеплъыкIэхэр зэрагъэшIагъэх.

Адыгеим иеджапIэхэм яа 1 — 4-рэ классхэм (нэбгырэ мин 25-рэ фэдиз) ыкIи я 5 — 11-рэ классхэм (нэбгырэ мини 9 фэдиз) ыпкIэ хэмылъэу гъэрекIо къыщегъэжьагъэу шхын стыр араты. Хэгъэгум ихэбзэгъэуцугъэ къызэрэди­лъы­тэрэм тетэу ащ фэдэ IэпыIэгъур араты. Адыгэ Республикэм и Премьер-министрэ игуадзэу Наталья Широковам иинстаграм къыригъэхьагъ: «КIэлэеджа­кIохэм арагъэшхырэр фашIэ иIэу, гохьэу ыкIи зэмылIэужыгъоу щытын фае. Рес­публикэм и ЛIышъхьэ еджапIэхэм гъэшхэныр зэращызэхэщагъэм ренэу ынаIэ тырегъэты».

Мы илъэс еджэгъум республикэ бюджетым сомэ миллиони 5 къыхагъэкIыгъ кIэлэеджакIохэм ягъэшхэн пэIуагъэхьа­нэу, федеральнэм – сомэ миллион 245-рэ фэдиз.

Сэкъатныгъэ зиIэхэу яунэхэм арысхэу еджэхэрэм Iоныгъом и 1-м къыщыублагъэу гъомылэпхъэ зэхэугъоягъэхэр е ахъщэу ащ пэIухьащтыр араты.