Хъоршэрыгъэ зыхэлъ бзэджэшIагъэ зезыхьэхэрэм цIыфхэр, анахьэу нэжъ-Iужъхэр, агъапцIэхэзэ ахъщэхэр зэраIахыхэрэм, банкым счетэу щыряIэм щаугъоигъэр зэрашIуатыгъурэм икъэбар, мафэ къэс пIоми хъунэу, къэбар жъугъэм иамалхэм къаты.

Зыщыщ умышIэу телефонымкIэ къытеуагъэм къыIорэр бгъэцакIэ зэрэмыхъу­щтыр, апэрапшIэу узэпхыгъэ банкым уфытеомэ зэрэнахьышIур къаIо зэпытми, ар зыгъэцакIэрэр макIэ. Мы Iофыр гумэкIыгъо дэдэ хъугъэ, хэбзэухъумакIохэм ямызакъоу, банкхэри бзэджа­шIэхэм узэрапэшIуекIощт хэкIыпIэхэм алъэхъух.

ЦIыфым счет банкым зыщигъэпсыкIэ пэIудзыгъэ шIыкIэм тетэу ар ыгъэIорышIэнэу амал къыреты. ГущыIэм пае, «мобильный банк» зыфиIорэ фэIо-фашIэр, нэмыкIхэр. Цифрэ шIыкIэм тетэу банкым ыгъэцакIэрэ фэIо-фашIэхэр ыгъэфедэнхэу къыхэзыхыгъэм исчет икъэбар, ахъщэу илъыр зыфэдизыр, икартэ иномер ыгъэбылъынхэу, ежь нэмыкI зыпари ащ щымыгъозэшъунэу амал ептын фаеу Урысые Банкым елъы­тэ. Ащ хъоршэрыгъэ хэлъэу бзэджэшIагъэ зезыхьэхэрэм нэжъ-Iужъхэр, сэкъат­ныгъэ зиIэхэр ащиухъумэщтхэу ары испециалистхэм къызэраIорэр.

Ащ нэмыкI хэкIыпIи къагъэнафэ. ГущыIэм пае, нэжъ-Iужъым счет банкым щыриI. А банк дэдэм инэIуасэ горэми счет къыщызэIуихыгъ. Ар цыхьэ зыфишIырэ цIыфэу щытмэ, IэпыIэгъоу ыштэнэу амал етыгъэн фаеу Гупчэ Банкым къеIо. Нэжъ-Iужъым исчет илъ ахъщэм ылъэныкъокIэ операцие горэ ышIынэу ежьагъэмэ, а IэпыIэгъум макъэ еIущт. Ащ Iофым хэхъухьэрэм къыкIэупчIэнэу фитыныгъэ иIэщт. Хъоршэрыгъэ къыдызэрахьэу егуцэфагъэмэ, операциер ымышIынэу а нэжъ-Iужъыр ыгъэдэIон ылъэкIыщт.

Шъыпкъэ, мыщ нэжъ-Iужъым ишIоигъоныгъэ хэлъын фае. Илъэс 18-м зыныбжь шIокIыгъэу цыхьэ зыфишIырэ цIыф IэпыIэгъоу ыштэн ылъэкIыщт, иIахьылми, иныбджэгъуми хъущт. Ащ счетым илъ ахъщэр зыфэдизыр ышIэн фаеу щытэп, ау банкым ифэIо-фашIэу ыгъэфедэрэр, ыгъэпсынэу зыфежьагъэр лъыIэсыщт.

Ари хэкIыпIэ дэепын фай. Зыщыщ умышIэрэ цIыфэу телефонымкIэ къыпфытеуагъэм цыхьэ фэпшIэу къыIохэрэр бгъэцэкIэным нахьи уинэIуасэ е уигупсэ цыхьэ фэпшIыныр нахь тэрэз.

ХЪУТ Нэфсэт.