Iоныгъом и 17-м щегъэжьагъэу и 19-м нэс кIощт хэдзынхэр хэбзэгъэуцугъэм диштэу, шъыпкъагъэ хэлъэу зэхэщэгъэн­хэм фытегъэпсыхьагъ Адыгэ Республикэм и Общественнэ палатэ иплощадкэ къыщызэIуа­хыгъэ общественнэ видеолъыплъэным и Гупчэ. Ащ илъэтегъэуцо тыгъуасэ щыIагъ. Iоф­тхьабзэм къырагъэблэгъагъэх республикэм иобщественнэ объединениехэм ыкIи политикэ партиехэм ялIыкIохэр.

Адыгэ Республикэм и Общественнэ палатэ и Тхьаматэу Устэ Руслъан къызэриIуагъэмкIэ, хэдзынхэр зыщыкIохэрэ мафэхэм Гупчэм ихэушъхьэфыкIыгъэ мониторхэм онлайн шIы­кIэм тетэу Iоф ашIэщт, хэдзынхэмкIэ чIыпIэ комиссиехэм къякIолIагъэхэ цIыфхэм амакъэ зэратырэм общественникхэр лъыплъэнхэ алъэкIыщт. Ахэм япчъагъэ нэбгырэ 15-м щегъэ­жьагъэу 30-м нэсынэу къалъытэ.

Общественнэ лъыплъэкIо 530-рэ фэдиз рагъэджагъ, хэбзэгъэу­цугъэм диштэу ахэр зэрэзекIонхэ фаехэр къафаIотагъэх. Ады­геим хэдзынхэмкIэ икомиссии 139-мэ ыкIи чIыпIэ хэдзыпIэ участки 9-мэ мыщ фэдэ камерэхэр ачIэтыщтых, ахэм ачIэ­хъухьэрэр общественникхэм, партиехэм ялIыкIохэм, нэ­мыкIхэм занкIэу алъэгъущт.

Хэбзэгъэуцугъэр аукъуагъэу е хэукъоныгъэ горэ щыIэу загъэунэфыкIэ, ар къызщыхъугъэ чIыпIэм лъыплъакIохэр кIощтых, джащ фэдэу телефон зэпхыныгъэм иамалхэр къызфагъэфедэзэ закъыфэзыгъазэхэрэм джэ­уапхэр аратыжьыщтых.

Мы IофшIэным волонтерхэр къыхагъэлэжьэщтых, коронавирусым пэшIуекIогъэным пае санитарнэ шапхъэхэм ягъэцэ­кIэн анаIэ тырагъэтыщт.

Къэралыгъом ишъолъыр 85-мэ мыщ фэдэ гупчэхэм Iоф ащашIэщт.

ТХЬАРКЪОХЪО Адам. Сурэтыр Iэшъынэ Аслъан тырихыгъ.