Хэдзынхэм япэгъокIэу
Адыгэ Республикэм хэдзынхэмкIэ и Гупчэ комиссие ия 134-рэ зэхэсыгъо тыгъуасэ иIагъ. Iофтхьабзэм упчIи 7-мэ ащыхэплъагъэх, унэшъо гъэнэфагъэхэр ашIыгъэх. АР-м хэдзынхэмкIэ и Гупчэ комиссие итхьаматэу Сэмэгу Нурбый зэхэсыгъор зэрищагъ.
Iофтхьабзэм ипэублэ яенэрэ зэIукIэгъумкIэ Урысые Федерацием и Федеральнэ ЗэIукIэ и Къэралыгъо Думэ идепутатынымкIэ хэдзын бюллетеным хэтыгъэ Дмитрий Потапенкэр зэрэхахыжьыщтым Гупчэм исекретарэу ХьацIэцIэ Фатимэ къытегущыIагъ. Ащ къызэриIуагъэмкIэ, Урысыем иапшъэрэ хьыкум ышIыгъэ унашъом ыпкъ къикIыкIэ УФ-м хэдзынхэмкIэ и Гупчэ комиссие ащ фэдэ унашъо ышIыгъ. Урысые политическэ партиеу «Российская партия свободы и справедливости» зыфиIорэм ар къыгъэлъэгъогъагъ. Iоныгъом и 16-м нэс Дмитрий Потапенкэр спискэм хахыжьынэу пшъэрылъ къагъэуцугъ.
Урысые Федерацием и Къэралыгъо автоматизированнэ шIыкIэу «Выборы» зыфиIорэр къызыфагъэфедэзэ Iоныгъом и 17-м, 18-м ыкIи 19-м щыIэщт хэдзынхэм афэгъэхьыгъэ къэбархэр къызыщырагъэхьащт графикым нэужым тегущыIагъэх.
Адыгэ Республикэм и Къэралыгъо Совет – Хасэм Кощхьэблэ районымкIэ зы мандат зиIэ хэдзыпIэ коеу N 4-м идепутат хэдзыгъэнымкIэ зыкъэзыгъэлъэгъуагъэм ицыхьэшIэгъум комиссием хэтхэм дырагъэштагъ.
Iофтхьабзэм икIэух Красногвардейскэ районымкIэ хэдзынхэр зэрэзэкIахьагъэм фэгъэхьыгъэу тегущыIагъэх. Iоныгъом и 11-м мы районымкIэ кандидатэу зыкъэзыгъэлъэгъогъэ бзылъфыгъэм хэдзынхэм ахэмылэжьэнэу заявление къычIилъхьагъ. Ащ къыхэкIыкIэ мы хэдзыпIэ коимкIэ зы кандидат нахь къэнагъэп. Хэбзэгъэуцугъэм диштэу хэдзынхэр зэкIахьагъ. Тыгъэгъазэм и 19-м ар ахьыжьыгъ.
ДЕЛЭКЪО Анет