Iоныгъом и 12-м Адыгеим ирайонхэм ащыщхэм жьыбгъэшхо къыщилъыгъ ыкIи ощх-ошъу зэ­хэт къащехыгъ. Мафэр фабэшхоу, тыгъэр къеп­сыщтыгъ нахь мышIэми, щэджэгъо уж­хэм адэжь ошIэ-дэмышIэу ошъуапщэр къыте­хьагъ, нэужым кIочIэ ин иIэу жьыбгъэр къи­лъыгъ. Ащ ыуж такъикъи 10 тешIагъэу шыб­лэр гъуагъоу къыригъэ­жьагъ ыкIи ошъушхор къехыгъ.

Анахьэу ом изытет игумэкIыгъохэр зэхэзышIагъэхэр Мыекъуапэ щыпсэухэрэр ары. Сыда пIомэ ошъоу къехыгъэм иинагъэ сырныч зыдэлъ къэмланэм ыкIи кIэнкIэм фэдиз хъущтыгъэу бэмэ агъэунэфыгъ. Къэлэдэсхэм къызэраIощтыгъэмкIэ, такъикъ 15-рэ зэпымыоу ошъур къе­хыгъ. Водительхэр гуIэхэзэ ямашинэхэр техъохэмкIэ аухъумэщтыгъэх.

Жьыбгъэм, ощх-ошъу зэхэтэу къехыгъэм цIыфхэм, унагъохэм зэрар арихыгъ. Бэмэ ягъэфэбапIэхэм, ямашинэхэм ыкIи бгъагъэхэм фыкъуагъэхэр афишIыгъэх.

Джащ фэдэу ощхым, ошъум ыкIи пчыкIэм апкъ къикIэу Мыекъуапэ иэлектричествэ псэуалъэхэм ащыщхэм яIофшIэн зэпыу фэхъугъ. Кв 6 хъурэ электричествэр зэрыкIорэ линиеу ТП-352-м пчыкIэр къызеом ыгъэфыкъуагъ. Ащ ыпкъ къикIэу урамхэу Новэм, Клубнэм, Юбилейнэм ащыщ­хэм, джащ фэдэу урамхэу я 2-рэ Первомайскэр ыкIи я 2-рэ Советскэм щыпсэухэрэм электричествэр ямыIэу къэнагъэх. Iоныгъом и 13-м пчэдыжьым къыщегъэжьа­гъэу Мыекъопэ электрическэ сетым иоперативнэ-дэкIыгъо бригадэ зэтегъэуцожьын IофшIэнхэр зэхищагъэх. ЦIыфхэм электричествэр аратыжьыгъ.

КIарэ Фатим.