Лъапсэ фэхъугъэр зэрагъашIэ
Iоныгъом и 11-м Мыекъуапэ имэшIогъэкIосэ къулыкъу къэбар къыIэкIэхьагъ урамэу Советскэм иунэу № 203-м тет кафеу «Сицилия» зыфиIорэм машIор къыкIэнагъэу. Мы хъугъэ-шIагъэр зыщыхъугъэ чIыпIэм псынкIэу къалэм имэшIогъэкIосэ къулыкъу иIофышIэхэр къэсыгъэх.
МашIом игъэкIосэнкIэ IофшIэным ыкIи кIуачIэхэм язэхэщэн пэщэныгъэ дызэрихьагъ УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу АР-м щыIэм ипащэу Станислав Илющенко.
МэшIогъэкIосэ къулыкъум иапэрэ подразделение мы чIыпIэм къызэрэсэу ыгъэунэфыгъ псэупIэм ышъхьэ къыкIэнагъэу зэрэстырэр. ЗэкIэмкIи квадратнэ метрэ 700 фэдиз машIом зэлъиштэгъагъ. Зыпари хэкIодагъэп ыкIи шъобжхэр атещагъэхэ хъугъэп.
Мы гумэкIыгъом идэгъэзыжьынкIэ УФ-м ошIэ-дэмышIэ IофхэмкIэ и Министерствэ иIофышIэ нэбгырэ 24-мэ акIуачIэ ыкIи техникэ зэфэшъхьафхэу 7 хагъэлэжьагъ.
УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу АР-м щыIэм ипресс-къулыкъу ипащэу Тхьагъэлэдж Марыет къызэриIуагъэмкIэ, ГъэIорышIапIэм дознанием икъулыкъурэ Краснодар щыIэ мэшIогъэкIосэ ушэтэкIо лабораториемрэ зэгъусэхэу машIом лъапсэу фэхъугъэр мы мафэхэм зэрагъашIэ.