УФ-м и Президентэу Владимир Путиным джыри Урысыем икъэлэ 12-мэ «Город трудовой доблести» зыфиIорэ цIэр афэгъэшъошэгъэным дыригъэштагъ. Ащ фэгъэхьыгъэ унашъом охътэ благъэм зэрэкIэтхэщтыр зэхэщэкIо комитетэу «ТекIоныгъэм» изэхэсыгъоу тхьамэтагъор зыщызэрихьагъэм къыщиIуагъ.

«Хэгъэгу зэошхом илъэхъан советскэ народым лIыхъужъныгъэу зэрихьагъэр зэпстэумэ ащигъэгъупшэн, ыгъэцIыкIун зыгу хэлъхэм Урысыем афидэщтэп, — къыIуагъ къэралыгъом ипащэ. – ЯтIонэрэ дунэе заом идесэхэр дэгъоу къэтэшIэжьых, арышъ, цIыф лъэпкъым пэшIуе­кIорэ планышхохэр зыгъэуцугъэ­гъэ бзэджашIэхэм къакъоуцохэу, ахэр тэрэзыгъэхэу зыIохэрэм адедгъэштэщтэп».

Хэгъэгу зэошхом илъэхъан тылым щыIагъэхэри Владимир Путиным къыхигъэщыгъэх. Чэщи мафи зыгъэпсэф ямыIэу ахэм фабрикэхэм, заводхэм, госпитальхэм, лабораториехэм Iоф зэращашIагъэм ишIэжь мыкIодыным пае «Город трудовой доблести» зыфиIорэ цIэр зэрагъэнэфагъэм къыкIигъэтхъыгъ.

Урысыем икъэлэ 32-мэ ар афагъэшъошагъ. ЗэуапIэм ыкIи тылым лIыхъужъныгъэу ащызэрахьагъэм епхыгъэ псэуалъэу, саугъэтэу ахэм адэтхэр ифэ­шъуа­шэм тетэу зэтырагъэпсы­хьанхэу, ныбжьыкIэхэм а зэпстэур алъыгъэIэсыгъэным пае программэ гъэнэфагъэ зэхагъэу­цонэу пшъэрылъ къыгъэуцугъ.