ТхылъеджапIэхэмрэ кIэлэцIыкIу театрэхэмрэ зэтырагъэпсыхьэх
Федеральнэ бюджетым къыхагъэкIынышъ тхылъеджапIэхэмрэ кIэлэцIыкIу театрэхэмрэ язэтегъэпсыхьан ахъщэ тедзэу апэIуагъэхьащтыр шъолъырхэм зэратырагощэщтыр Урысые Федерацием и Правительствэ ыухэсыгъ.
Модельнэ муниципальнэ тхылъеджапIэхэм сомэ миллиони 5, тхылъеджэпIэ фондхэр нахьыбэ шIыгъэнхэм — сомэ миллиони 2,5-рэ фэдиз, кIэлэцIыкIу театрэхэм язэтегъэпсыхьан — сомэ миллиони 3,8-м ехъу джыри къафыхагъэкIыгъ.
«Ныбжь зэфэшъхьаф зиIэ цIыфхэу республикэм щыпсэухэрэм защагъэпсэфынэу, яшIэныгъэхэм ащахагъэхъонэу культурэм иучреждениехэр щытынхэм тынаIэ тетэгъэты. Ащ пае культурэм иунэхэр ашIых ыкIи агъэцэкIэжьых, модельнэ тхылъеджапIэхэр агъэпсых, искусствэхэмкIэ кIэлэцIыкIу еджапIэхэр уахътэм диштэу зэтырагъэпсыхьэх, джащ фэдэу культурэм иучреждениехэм джырэ оборудованиер аIэкIагъахьэ. Урысые Федерацием и Правительствэрэ Урысые Федерацием и Федеральнэ ЗэIукIэрэ яIэпыIэгъу амал къытеты хэгъэгум и Президент лъэпкъ проектэу «Культурэр» пхырыщыгъэнымкIэ пшъэрылъхэу къыгъэуцугъэхэр нахь шIогъэ ин хэлъэу зэшIохыгъэнхэмкIэ», — къыIуагъ Адыгеим и ЛIышъхьэу КъумпIыл Мурат.
Адыгеим ыцIэкIэ Къэралыгъо Думэм идепутатэу Владислав Резник иIэпыIэгъу хэлъэу бюджет ассигнованиехэр атегощэгъэнхэмкIэ Урысые Федерацием и Правительствэ унашъо ыштагъ, УФ-м и Федеральнэ ЗэIукIэ и Комиссие игъо зелъэгъум ыуж, мылъку къафыхэгъэкIыгъэным фэгъэхьыгъэу.
2021-рэ илъэсымкIэ федеральнэ бюджетым къыхагъэкIынышъ Адыгеим къыIэкIэгъэхьан фаеу агъэнэфэгъэгъэ сомэ миллиони 10-м нэмыкIэу муниципальнэ модельнэ тхылъеджапIэхэм ахъщэ тедзэ апэIуагъэхьагъ. КIэлэцIыкIу театрэхэм язэтегъэпсыхьан федеральнэ субсидиеу мы илъэсымкIэ сомэ миллиони 5-у рахъухьэгъагъэм нэмыкIэу ахъщэ тедзэ къафатIупщыгъ.
Адыгеим ыцIэкIэ депутатым къызэрэхигъэщыгъэмкIэ, Урысыем и Президент мэлылъфэгъум Федеральнэ ЗэIукIэм фигъэхьыгъэ Джэпсалъэр гъэцэкIагъэ хъуным пае шъолъыр зэфэшъхьафхэм ахъщэ тедзэ къафыхэгъэкIыгъэным ехьылIэгъэ унашъор зыштагъэхэр парламент Комиссиемрэ УФ-м и Правительствэрэ арых.
«КIэлэцIыкIу ыкIи нысхъэпэ театрэхэм гъэсэныгъэмкIэ, пIуныгъэмкIэ, кIэлэцIыкIухэмрэ Iэтахъохэмрэ гушъхьэлэжь, творческэ хэхъоныгъэ ашIынымкIэ мэхьанэшхо яIэу щыт. Джащ фэдэу тхылъеджапIэхэми ямэхьанэ зыкъеIэты зэпыт. Джырэ шапхъэхэм адиштэу ахэр зэтегъэпсыхьагъэх, тихэгъэгу ипсэупIэ пстэуми ащыпсэухэрэм онлайн шIыкIэм тетэу шIэныгъэ зэрагъэгъотынымкIэ, гъэсэныгъэр нахьышIоу зэхэщэгъэнымкIэ, культурэм зыкъыIэтынымкIэ ахэм яшIуагъэ къэкIощт», — къыIуагъ Владислав Резник.
АР-м и ЛIышъхьэ ипресс-къулыкъу