— ИкIыгъэ илъэсым Кавказ заповедникым бэрэ сыкъэкIуагъ. ЧIыпIэ хьалэмэтхэр къэскIухьагъэх, палаткэм сыщыпсэугъ ыкIи къызгурыIуагъ тичIыопс идэхагъэкIи ибаигъэкIи IэкIыб хэгъэгухэм къащытлъэгъухэрэм зэрэнахь мыдэир. Заповедникым ипроектыкIэу «Тропа чувств» зыфиIорэм икъэбар зызэхэсэхым, ащ сызэрэхэлэжьэн слъэкIыщт шIыкIэр шIэхэу сшъхьэ къихьагъ, — къыIотагъ урысыемысатыу организациеу «Наш фонд» зыфиIорэм иныбджэ­гъушIоу, предпринимателэу Андрей Потаповым. Фондым хэхьэх предпринимательхэу ыкIи цIыф чанхэу заповедникымрэ национальнэ паркхэмрэ къызэтегъэнэгъэнхэм фэгумэкIыхэзэ ямылъкукIэ IэпыIэгъу къафэхъухэрэр.

ПроектыкIэу экологическэ маршрутым пы­лъым къызэрэщиIорэмкIэ, ар нэмыкI маршрут­хэм зэратекIыхэрэр щыI. Гущы­Iэм пае, умыгумэкIэу маршрутым урэкIо, мэ гохь зэфэшъхьафхэр зэхэошIэх, бзыухэм яорэд къэIон огъэшIагъо, етIанэ ошIэ-дэмышIэу бгъэжъы­шхоу «зытамэхэр ушхуагъэхэр» уапашъхьэ къеуцо е тхьакIумэшхоу къушъхьэхэр «зэрэдаIорэр» олъэгъу…

Пкъыгъо пстэоу узыIукIэхэрэр пхъэхэм, кIапсэхэм, гъучIым ахэшIыкIыгъэщтых. Ахэм ахъщэ макIэп апэIухьагъэр.

Андрей Потаповым ишъэогъу­хэри къыхигъэлажьэхи лъагъом тырагъэуцощт макетхэм ате­фэщт ахъщэр къаугъоигъ.

Макетхэр зылъэгъухэрэм яцIыкIугъо псынкIэу агу къэ­кIыжьыщт, гушIом зэлъиштэщтых, лъа­гъор бэрэ агу илъыщт. ЦIыф жъугъэу заповедникым къакIохэрэр бжыхьэм ыкIэ нэс маршрутыкIэм рыкIонхэ алъэ­кIыщт, ащ игъэпсын шIэхэу къаухыщт. Шъаукъо Аслъангуащ.