Тыкъэзыуцухьэрэ дунаим икъэухъумэн фытегъэпсыхьэгъэ Iофтхьабзэхэу зэрэ Урысыеу щыкIохэрэм афэдэхэр Адыгеим икъэлэ шъхьаIи щырекIокIых. «Дни зеленых действий» зыфиIорэм диштэу волонтерхэмрэ общественностымрэ акIуачIэ зэхэлъэу экологием икъэухъумэн фытегъэпсыхьэгъэ Iофыгъохэр зэшIуахых.

ГущыIэм пае, Iоныгъом и 6-м лицееу N 34-м къыпэIулъ чIыпIэм къырым сэснэй чъыг 50 щагъэтIысхьагъ. Урамхэу Мартым и 12-мрэ Гариным ыцIэ­кIэ щытымрэ ягъогубгъуитIукIэ щыт а чъыг ныбжьыкIэхэр нэу­жым жьаупIэ хъущтых. Мы чъыг лъэпкъым илъэс 200 — 300 фэдиз къегъашIэ. Илъэс псаум ар уцышъоу щытыщт, жьыбгъэшхоми, фэбэшхоми ащыщтэрэп.

«ЕджэпIакIэм дэжь а чъыг лъэпкъыр зэрэщыдгъэтIысхьагъэм мэхьэнэ гъэнэфагъэ иIэу щыт. Хэхъоныгъэ зышIырэ чIыпIэм уцышъо шъолъырыкIэ дахэ къитэджэщт. Непэрэ кIэ­лэеджа­кIохэр, уахътэ зыте­шIэкIэ, ны-ты хъущтых ыкIи якIэлэцIыкIухэр ягъусэхэу мыщ къыщакIухьащт», — къыIуагъ гъэсэныгъэмкIэ къалэм и Коми­тет ипащэу Ольга Романенкэм.

«Дни зеленых действий» зыфиIорэ Iофтхьабзэу тыкъэзыуцухьэрэ дунаим икъэухъумэн фытегъэпсыхьагъэм къалэм иобщественнэ чIыпIэхэр къэбзэнхэмкIэ ишIуагъэ къэкIощт.