Iоныгъом и 22 – 26-м Урысыем дзюдомкIэ изэнэкъокъу Мыекъуапэ щыкIощт.

Адыгэ къэралыгъо университетым физкультурэмрэ дзюдомрэкIэ и Институт хэгъэгум ибэнакIохэр щызэIукIэщтых.

— Хъулъфыгъэхэр, бзылъфыгъэхэр зэнэкъокъум хэлэжьэщтых, — къытиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим дзюдомкIэ ихэшыпыкIыгъэ командэ итренер шъхьаIэу Бастэ Сэлымэ. — Ащ фэдэ зэнэкъокъу иныр тиреспубликэ зэрэщызэхащэрэм тегъэгушхо. ЗэIукIэгъухэр Мыекъопэ бэнэпIэ еджапIэм лъапсэ фэзышIыгъэ тренер цIэрыIоу Кобл Якъубэ ишIэжь фэгъэхьыгъэх.

Мы мафэхэм зэхэщэн Iофыгъохэр Адыгеим щэкIох, зэнэкъокъур гъэшIэгъонэу зэрэкIощтым щэч хэлъэп.