Къэралыгъом щызэхащэрэ зэнэкъокъоу «Илъэсым иунагъу» зыфиIорэм и Урысые ыкIи шъолъыр едзыгъохэм текIоныгъэр къащыдэзыхыгъэхэр тыгъуасэ АР-м и Правительствэ и Унэ щагъэшIуагъэх. Адыгэ Республикэм и ЛIышъхьэу КъумпIыл Мурат ыцIэкIэ АР-м и Премьер-министрэу Геннадий Митрофановыр ахэм къафэгушIуагъ, анахь къахэщыгъэ унагъохэм дипломхэр ыкIи шIухьафтын лъапIэхэр аритыжьыгъэх.

Адыгеим и Премьер-министрэ зэнэкъокъум текIоныгъэ къыщыдэзыхыгъэхэм афэгушIозэ, мыщ фэдэ Iофтхьабзэхэм мэхьанэшхо зэряIэр хигъэунэфыкIыгъ.

— Илъэс къэс мы зэнэкъо­къум унагъохэр жъугъэу зэ­рэхэ­лажьэхэрэм, шъолъырым илIыкIохэм гъэхъэгъэшIухэр зэряIэ­хэм къегъэлъагъо унагъом имэхьанэ республикэм осэшхо зэрэщыфашIырэр, зэрифэшъуашэу ясабыйхэр зэрапIухэрэр, IэпыIэгъу зэрэзэфэхъужьыхэрэр. Сабый зэрыс унагъохэм щыIэ­кIэшIу яIэныр, ахэм IэпыIэгъу афэ­хъу­гъэныр, нахь пытэ хъунхэр къэралыгъо пшъэрылъ шъхьа­Iэу сыдигъуи щыт, — къы­Iуагъ Геннадий Митрофановым.

Нэужым Урысые зэнэкъо­къоу «Илъэсым иунэгъо анахь дэгъу» зыфиIорэм иуцугъоу «Урысыем иунэгъо дышъ» зыцIэм текIоныгъэ къыщыдэзыхыгъэ зэшъхьэгъусэхэу Скрипниченко Владимиррэ Екатеринэрэ дипломрэ шIухьафтынрэ афагъэшъошагъ. Ахэр Кощхьэблэ районым щэпсэух, зызэкIыгъухэр мы мазэм илъэс 55-рэ хъущт. Ящытхъу арагъаIозэ унагъор мэпсэу, сабыитIу зэдапIугъ, ахэм къакIэхъухьажьыгъэ пхъо­рэлъф-къорэлъфхэр джы апIух.

Урысые зэнэкъокъум ишъо­лъыр уцугъоу «Унагъор — хабзэхэм яухъумакIу» зыфиIорэмкIэ текIоныгъэ къыдэзыхыгъэр Теуцожь районым щыпсэурэ Тхьаркъохъо Юрэрэ Хъариетрэ. Юрэ илъэс пчъагъэ хъугъэу Теуцожь Цыгъо ыцIэ зыхьырэ музеим ипащэу Iоф ешIэ, Хъариет СтIашъу Юрэ ыцIэкIэ къы­зэIуахыгъэ декоративнэ прикладной искусствэмкIэ музеим ыкIи кружокым ипащэу Iоф ешIэ. Адыгэ шэн-хабзэхэм якъэухъу­мэн унагъор ишъыпкъэу пылъ.

«Сабыибэ зэрыс унагъу» зыфиIорэмкIэ шъолъыр уцугъом текIоныгъэ къыщыдихыгъ Мые­къопэ районым щыпсэурэ Кравченкэхэу Викторрэ Татьянэрэ яунагъо. ЗэгурыIоныгъэ азы­фагу илъэу сабыитф зэдапIу. «Къоджэ унагъор» зыфиIорэмкIэ анахь къахэщыгъэр Шэуджэн районым щыпсэурэ Цэй Руслъанрэ Зами­рэрэ яунагъу, сабыищ зэдапIу. «Унэгъо ныбжьыкI» зыфиIорэмкIэ Джэджэ районым щыщ Маушэ Айдэмыррэ Сусанэрэ текIоныгъэ къыдахыгъ.

Урысые зэнэкъокъум текIоныгъэ къыщыдэзыхыгъэ Скрипниченко Владимир зэхэщакIохэм зэрафэразэр къыIуагъ. Унагъом мэхьанэу иIэр къыткIэхъухьэрэ лIэужхэм къагурыIоным фэшI мыщ фэдэ зэнэкъокъухэм шIуа­гъэ къызэрахьырэр къыхигъэщыгъ. Яунагъохэм шэн-хабзэ дахэхэр арылъэу, нахьыжъхэм шъхьэкIэфэныгъэ афашIызэ ясабыйхэр зэдапIунхэ зэрэфаер къыIуагъ.

ДЕЛЭКЪО Анет.