Къэралыгъо социальнэ IэпыIэгъу Адыгэ Республикэм щытыгъэным фэгъэхьыгъэ хэбзэгъэуцугъэм къыдыхэлъытагъэу цIыфэу зигъот узэрыпсэун плъэкIыщт ахъщэ анахь макIэм нэмысыхэрэм адеIэнхэм фэшI зэзэгъыныгъэм адыкIатхэх.

«Социальный контракт» ащ зэреджагъэхэр. Ар бгъэпсыным пае IофшIэнымкIэ ыкIи цIыфхэр социальнэу къэухъумэгъэнхэмкIэ Гупчэм зыфэбгъэзэн фае.

Пособиеу къатыхэрэм мы социальнэ контрактыр зэратекIырэр цIыфым ежь-ежьырэу зиIыгъыжьын амал зэрэритырэр ары. Мыщ къыдыхэлъытэгъэ ахъщэр зыпэIубгъэхьащтхэр гъэнэфагъэх. Ахэр:

— IофшIэпIэ чIыпIэ улъыхъуныр (унагъом сомэ 10404-рэ мэзиплIым къыфэкIощт);

— Унэе бизнес гъэпсы­гъэ­ныр (зэтыгъоу сомэ 250000-рэ унагъом къыраты);

— Унэгъо хъызмэт зэхэщэгъэныр (ащ пае уна­гъом сомэ 100000 къыфатIупщы);

— НэмыкIэу чIыпIэ къиным къизыщыщтхэр, гущыIэм пае, щыгъын, Iэзэгъу уцхэр, гъомылапхъэхэр зэриг­ъэгъотынхэр (сомэ 10404-рэ мэзихым къы­фэкIощт).

Мыхэр зэкIэри цIыфым ежь-ежьырэу зиIыгъыжьын ылъэкIыным фытегъэпсыхьа­гъэх.

2020-рэ илъэсым унэгъо 50-мэ ащ фэдэ социальнэ зэзэгъыныгъэм адыкIэтхагъэх, республикэ бюджетым къыхэхыгъэу сомэ миллиони 3 зэкIэмкIи аратыгъ. ЦIыфхэм гъотэу яIэм хэхъоным, тхьамыкIэу псэухэ­рэм япчъагъэ фэдитIукIэ нахь макIэ хъуным фытегъэпсыхьэгъэ лъэпкъ гухэлъхэм къадыхэлъытагъэу Адыгеим социальнэ IэпыIэгъум пэIуигъэхьанэу 2021 — 2023-рэ илъэсхэм федеральнэ бюджетым къыхэхыгъэу сомэ миллион 85-рэ мин 776,4-рэ къыфэкIощт.