Шэмбэтым зэхащэ
Урысыем иIофтхьабзэу «Культурная суббота» зыфиIорэм Адыгэ Республикэм итворческэ купхэр хэлэжьэщтых.
Iоныгъом и 11-м онлайн шIыкIэм тетэу эфирым занкIэу къыщагъэлъэгъощтых культурэм иIофышIэ- хэр Iофыгъом зэрэхэлажьэхэрэр.
Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм иартистхэр республикэм и Лъэпкъ тхылъеджапIэ щыIэщтых.
Республикэм искусствэхэмкIэ иколледжэу Тхьабысымэ Умарэ ыцIэ зыхьырэм щеджэхэрэм театрализованнэ едзыгъохэр къагъэлъэгъощтых.
Литературнэ-музыкальнэ зэхахьэр Адыгэ Республикэм и Лъэпкъ тхылъеджапIэ щыкIощт.
КъокIыпIэм щыпсэурэ лъэпкъхэм искусствэхэмкIэ я Къэралыгъо музееу Мыекъуапэ дэтым IэпэIасэхэм яIофшIагъэхэм яхьылIэгъэ зэхахьэр щыкIощт.
Хьакурынэхьаблэ, Адыгэкъалэ, Гъобэкъуае, Тульскэм, нэмыкIхэм ямузейхэм нахьыжъхэм афэ- гъэхьыгъэ зэIукIэгъухэр ащыкIощтых.
Адыгэ Республикэм и Къэралыгъо Камернэ музыкальнэ театрэу Хьанэхъу Адамэ ыцIэ зыхьырэм, республикэм и Къэралыгъо филармоние, тхылъеджапIэхэм, къэлэ паркым, нэмыкIхэм зэхахьэхэр ащыкIощтых.
— Дунаим щыцIэрыIо ансамблэу «Налмэсым» иконцерткIэ «Культурная суббота» зыфиIорэ Iофтхьабзэр зэфэтшIыжьыщт, — къытиIуагъ Адыгэ Республикэм культурэмкIэ иминистрэу Аулъэ Юрэ. — Мафэм сыхьатыр 4-м концертыр рагъэжьэщт.
Зызыгъэпсэфы, культурэ Iофыгъохэм защызыгъэгъуазэ зышIоигъохэр зэхахьэмэ арагъэблагъэх, ыпкIэ амытэу яплъыщтых, мафэм сыхьатыр 11-м ахэр аублэщтых.