Я V-рэ Дунэе зэнэкъокъоу «Русская цивили­зация» зыфиIорэм сурэттеххэр хэлажьэх.

Лъэпкъ IофхэмкIэ федеральнэ агентствэм зэхищэгъэ зэнэкъо­къур 2021-рэ илъэсым Iоныгъом и 5-м къыщегъэжьагъэу чъэпы­огъум и 5-м нэс кIощт. Урысыем имызакъоу, дунаим исурэттеххэр зэнэкъокъум хэлажьэх, илъэс къэс нахь зеушъомбгъу.

Апэрэ дунэе зэнэкъокъум нэбгырэ мин 1,8-рэ хэлэжьагъ. Хэгъэгу 28-мэ сурэт мини 10 зэхэщакIохэм къафагъэхьыгъ. 2021-рэ илъэсым сурэттеххэм язэнэкъокъу нэбгырэ мини 5-м нахьыбэ хэлажьэ. Хэгъэгу 74-мэ ясурэттеххэм яIофшIэгъэ мин 20 фэдиз зэхэщакIохэм къаIэкIэхьагъ.

Илъэс 18 зыныбжьхэм къащыублагъэу зэнэкъокъум хэлэжьэнхэ фитых. Сурэт тезыхы зышIоигъохэр зэхэщакIохэм рагъэблагъэх. 2015-рэ илъэсым щегъэжьа­гъэу сурэтэу тырахыгъэхэр зэхэщакIохэм афэбгъэхьы хъущт. Зы нэбгырэм сурэти 5-м нэс иIофшIагъэхэм къахихын ылъэкIыщт.

ЧIыопсым идэхагъэ, хэгъэгум ишэн-хабзэхэм, архитектурэм ыкIи скульптурэм афэгъэхьыгъэхэр, «Лица и поколения» зыфиIорэр зэхэщакIохэм къыхахыгъэ темэ шъхьаIэх. «Лъэпкъыбэ зыщыпсэурэ Москва» зыфиIорэр, гушъхьэ кIуачIэм ехьылIэгъэ сурэтхэр зэхэщакIохэм ашIогъэшIэгъоных.

ХагъэунэфыкIырэ чIыпIэхэр къыдэзыхыхэрэм шIухьафтынхэр Москва щаратыжьыщтых. Хэ­гъэгум изыкIыныгъэ и Мафэ ехъу­лIэу зэфэхьысыжьхэр ашIыщтых.

Зэнэкъокъум нахь игъэкIотыгъэу зыщызыгъэгъозэнэу фаехэм Интернетым иамалхэр къызфагъэфедэнхэ алъэкIыщт.

Адыгеим исурэттеххэр зэнэкъо­къум чанэу хэлэжьэнхэу, респуб­ликэм ищытхъу аIэтынэу тэгугъэ.