Запасым щыIэ цIыфхэр мобильнэ резервым хэгъэхьэгъэнхэмкIэ проектэу «БАРС» зыфиIорэм игъэцэкIэн Урысыем щэкIо. Республикэм щыпсэурэ цIыфхэмкIэ мы проектым шIуагъэу ыкIи амалэу къытыхэрэм афэгъэхьыгъэу гущыIэгъу тыфэхъугъ Мыекъуапэ идзэ комиссарэу, подполковникэу Сергей Праздниковым.

Дзэ комиссарым къызэриIуагъэмкIэ, проектэу «БАРС-м» игъэцэкIэн къэралыгъом зыкъэухъумэжьынымкIэ амалэу IэкIэлъым хэгъэхъогъэным иIофшIэн план хэт, ащ ишIуагъэкIэ запасым щыIэ цIыфхэр псынкIэу агъэхьазырынхэ алъэкIы.

— Гуфитхэм (добровольцэхэм) IэнэтIэ гъэнэфагъэхэр яIэхэу дзэ частьхэм арапхыщтых. ТехникакIэхэм игъэфедэнкIэ ыкIи дзэм ылъэныкъокIэ шIэныгъэу аIэкIэлъхэм ахэгъэхъогъэнымкIэ мазэ къэс, тхьамафэм тIо-щэ гъогогъу егъэджэнхэр афызэхащэщтых. Джащ фэдэу илъэс къэс шIэныгъэу зэрагъэгъотыгъэр агъэпытэным фэшI игъэкIотыгъэ дзэ егъэджэнхэм ахэлэжьэщтых. Проектэу «БАРС-м» хахьэу резервым хэтхэу егъэджэн зэрэугъоихэм ахэлажьэхэрэм яIофшIэнкIэ зыпари пэрыохъу къа­фэхъущтэп, гурыт лэжьапкIэу къахьырэм тефэрэ компенсациер ахэр зыщылэжьэхэрэ предприятием къаритыжьыщт, — къыIуагъ С. Праздниковым.

Подполковникым къызэриIуагъэмкIэ, запасым щыIэ цIыфхэр УФ-м и УIэшыгъэ КIуачIэхэм ямобильнэ резерв хэ­гъэхьэгъэнхэм фэгъэхьыгъэ унашъом 2015-рэ илъэсым УФ-м и Президентэу В. Путиныр кIэтхагъ. ЦIыфхэр мобильнэ резервым хэгъэхьэгъэнхэмкIэ IофшIэныр шъолъыр дзэ комиссариатхэм апшъэ ралъхьагъ. Адыгэ Республикэр пштэмэ, 2015-рэ илъэсым къыщегъэжьагъэу офицер-резервистэу 7 иI, ахэм IэнэтIэ гъэнэфагъэхэр яIэхэу шъолъырым идзэ частьхэм Iоф ащашIэ. Джащ фэдэу IэнэтIэ зэфэшъхьафхэр агъэцэкIэнхэмкIэ проектым хэлажьэ зышIоигъохэм ялъэIу тхылъхэр кампанием къатынхэ алъэ­кIыщт.

Мыекъопэ къэлэ военкоматым гуфитхэм ялъэIу тхылъ 600 фэдиз къыугъоин фае. Шъугу къэдгъэкIыжьын, мыщ ыпэкIэ республикэм ичIыпIэ военкоматым къы­зэритыгъэмкIэ, а пчъагъэр 2500-рэ хъущтыгъэ. Резервым хэтэу къулыкъур зыхьын гухэлъ зиIэхэм ялъэIу тхылъхэр мы илъэсым чъэпыогъум нэс аIахыщтых.

Проектым хэлэжьэн зылъэкIыщтхэр

«БАРС-м» хэлэжьэнхэ алъэкIыщт цIыфхэу япсауныгъэкIэ къулыкъум къе­кIухэу дзэ учетым хэтхэр, гъэсэныгъэ зиIэхэр, сабыищым мынахьыбэу зиIэхэр.

— Кандидатхэм аныбжькIэ хабзэу щыIэхэр: дзэкIолIхэм, сержантхэм, старшинахэм, прапорщикхэм ыкIи мичманхэм аныбжь илъэс 42-м ехъу хъущтэп. Младшэ офицер составымкIэ — илъэс 47-м нэс, старшэ офицерым — илъэс 52-м нэс аныбжьынхэ фае, апэрэ ранг зиIэ полковникхэм ыкIи капитан- хэм аныбжь илъэс 57-м ехъу хъущтэп.

— ПсауныгъэмкIэ хабзэу щыIэхэр: япсауныгъэкIэ къулыкъум къекIухэрэм категориеу А, япсауныгъэкIэ макIэу зэщыкъуагъэу къулыкъум къекIухэрэм категориеу Б яIэнхэ фае. Ащ нэмыкIэу кандидатхэм я 9-рэ классым мынахь макIэу гъэсэныгъэ яIэн фае. Джащ фэдэу хьапс зытелъыгъэхэр аштэщтхэп. Илъэ­сищ пIалъэ иIэу зэзэгъыныгъэм зэдыкIэтхэщтых.

Резервым хэтэу къулыкъур зыхьы зышIоигъохэм АР-м и Дзэ комиссариат зыфагъэзэн ыкIи къулыкъум хэхьанхэмкIэ ялъэIу тхылъ рахьылIэн алъэкIыщт.

Мыекъуапэ идзэ комиссарэу С. Праздниковым къызэриIуагъэмкIэ, проектэу «БАРС-м» хэлажьэхэрэм дзэ къулыкъу­шIэхэм фэгъэкIотэныгъэу яIэхэм фэдэхэр зэкIэ къафыдалъытагъэх — илъэс къэс медицинэ уплъэкIунхэр арагъэшIыщтых, ахъщэ ыкIи щыгъынхэр аратыщтых, УФ-м игъэсэныгъэ учреждениехэм ащырагъэ­джэщтых. Ухьазырыныгъэ теплъэ дэгъу зэряIэщтым имызакъоу дзэ техникакIэу къежьагъэхэм хэшIыкI дэгъу афыряIэнми фагъэсэщтых. Джащ фэдэу Урысыем имедицинэ учреждениехэм зафагъэзэн алъэкIынэу гарантие яIэщт, ащ нэмыкIэу контракт шIыкIэм тетэу дзэ къулыкъум хэхьанхэ ыкIи Урысыем иапшъэрэ дзэ къулыкъу еджапIэхэм ачIэхьанхэ алъэ­кIыщт.

Къулыкъур ахьыфэ ахъщэ тынхэр аратыщтых. Дзэ частэу зыхэтым зэзэгъыныгъэ зэрадишIыгъэм тетэу званиеу ыкIи IэнатIэу иIэм елъытыгъэу къытефэрэ ахъщэ тынхэр къаратыщтых.

— Республикэм ис цIыфхэу япсауныгъэкIэ къулыкъум къекIухэу дзэ учетым хэтхэм ягухэлъхэр щыIэныгъэм щыпхыращынхэ, шIэныгъэу аIэкIэлъхэр къагъэлъэгъонхэм, обществэм уасэ къызфырагъэшIын ыкIи къэралыгъом шIуагъэ къыфахьыным проектэу «БАРС» зыфиIорэр фэIорышIэ, — къыIуагъ кIэухым Мыекъуапэ идзэ комиссар.

КIАРЭ Фатим.