Урысые Федерацием и Правительствэ и Тхьаматэ игуадзэу Александр Новак газыр аIэкIэгъэхьэгъэнымкIэ Федеральнэ штабым изэхэсыгъо зэрищагъ. Урысые Федерацием и Президент газыр джыри зэрамыщэлIагъэхэм алъыгъэIэсыгъэнымкIэ пшъэрылъхэу къафишIыгъэхэр зэрагъэцакIэхэрэм тегущыIагъэх.

Видеозэпхыныгъэм тетэу кIогъэ Iоф­тхьабзэм отраслэхэм яминистерствэхэм япащэхэр, ПАО-у «Газпромым» илIыкIохэр, шъолъырхэм яштабхэм япащэхэр хэлэжьагъэх.

Адыгеим ыцIэкIэ мыщ хэлэжьагъ Адыгэ Республикэм и Премьер-министрэу, газыр аIэкIэгъэхьэгъэнымкIэ республикэ штабым ипащэу Геннадий Митрофановыр.

Урысые Федерацием и Вице-премьерэу Александр Новак къызэрэхигъэ­щыгъэмкIэ, газыр икъоу алъыгъэIэсыгъэ­ным епхыгъэ IофшIэнхэр гъэпсынкIэгъэн­хэ ыкIи 2022-рэ илъэсымкIэ агъэнэфэгъагъэхэм ащыщхэм мы илъэсым ялъэIу афэгъэцэкIэгъэн фае.

Iофхэм язытет фэгъэхьыгъэу къэгущыIагъэх Урысые Федерацием и Минэнерго илIыкIохэр, регион штабхэм япащэхэр. 2021-рэ илъэсым Iоныгъом и 3-м ехъулIэу Адыгеим иплан-график унэ мини 5,6-рэ фэдиз къыделъытэ, а пчъагъэм етIани къыхэхъо. Социальнэ газификацием ипрограммэ хэлажьэмэ зышIоигъохэу республикэм исхэм МФЦ-р къызыфагъэфедэн алъэкIыщт, ащ нэмыкIэу Iахьзэхэлъ обществэу «Газпром газораспределение Майкоп» зыфиIорэм исайт ихьэхэми хъущт.

ГъэцэкIэкIо хабзэм икъулыкъухэм, къэлэ койхэм ыкIи муниципальнэ районхэм яадминистрациехэм ясайтхэм разделхэр яIэх программэм игъэцэкIэнкIэ амалхэу щыIэхэм цIыфхэр нахь игъэкIотыгъэу ащыгъэгъозэгъэнхэм пае. Ащ нэмыкIэу «линие плъырми» Iоф ешIэ.

Графикэу зэхагъэуцуагъэм тетэу цIыф псэупIэ 207-мэ адэт унэ мин 16,7-мэ газыр ящэлIэгъэн фае. Ащ амал къытыщт республикэмкIэ газыр икъоу зылъа­гъэIэсыгъэхэм япчъагъэ процент 97,17-м нэсынымкIэ.