Чъэпыогъум и 1-м къызэIуахыжьыщт
Хабзэ зэрэхъугъэу, илъэсыкIэ еджэгъум ехъулIэу республикэм гурыт еджапIэхэу итхэр зэтырагъэпсыхьажьых, агъэкIэжьых. Мы илъэсым поселкэу Яблоновскэм дэт гурыт еджапIэу N 5-м игъэкIотыгъэ гъэцэкIэжьынхэр щашIых. Мэкъуогъум ыкIэхэм адэжь IофшIэнхэр аублагъэх, ау зэрэщыгугъыгъэхэу аухын алъэкIыгъэп.
Гурыт еджапIэр къызызэIуахыгъэр мыгъэ илъэс 55-рэ хъущт. Непэрэ мафэм ехъулIэу кIэлэеджэкIо 1774-рэ ащ чIэс, апэрэ классым щеджэрэр 242-рэ.
Гурыт еджапIэм изытет уигъэрэзэнэу щытыгъэп. БэмышIэу учреждением ышъхьэ зэблахъугъ нахь мышIэми, ыкIоцI гъэцэкIэжьынышхохэр ищыкIэгъагъэх, тэрэзэу къэфабэщтыгъэп. Къэралыгъо программэу «Развитие образования» зыфиIорэм къыдыхэлъытагъэу еджапIэм игъэцэкIэжьын ыуж ихьагъэх. Федеральнэ, республикэ ыкIи район бюджетым къахэхыгъэ сомэ миллион 40-м ехъу ащ пэIухьанэу агъэнэфагъ.
Гурыт еджапIэм игъэфэбапIэхэр, псырыкIуапIэхэр зэкIэ зэблахъугъэх, канализациер зэтырагъэпсыхьажьыгъэ, джэхашъохэр, пчъэхэр зэблахъугъэх, дэпкъхэр чырбыщым нэс аукъэбзызэ икIэрыкIэу ашIыжьыгъэх. Ащ нэмыкIэу классищ чIэфэнэу къыпашIыхьажьыгъ.
Гурыт еджапIэм ипащэ тызэрэщигъэгъозагъэмкIэ, IофшIэнхэр заублэ ужым классхэми игъэкIотыгъэ гъэцэкIэжьынхэр зэрящыкIагъэр къэлъэгъуагъ, ащ паий зэзэгъыныгъэ зэу ашIын фаеу хъугъэ. ОшIэ-дэмышIэу къафыкъокIыгъэ IофшIэным ыпкъ къикIыкIэ Iоныгъом и 1-м гурыт еджапIэр къызэIуахыжьынэу игъо ифагъэхэп. Непэрэ мафэм ехъулIэу кIэлэеджакIохэр пэIудзыгъэ шIыкIэм тетэу еджэх. Мы илъэсым апэрэ классым къычIахьэхэрэр апэрэу чъэпыогъум и 1-м гурыт еджапIэм къэкIощтых, нэужым ягъэмэфэ зыгъэпсэфыгъо лъэхъан тIэкIу зэкIахьащт.
Iоныгъом и 1-м гурыт еджапIэр къызэрэзэIуамыхыжьыгъэм гумэкIыгъо къыздихьыгъ, ау аужырэ шапхъэхэм адиштэу зэрэзэтырагъэпсыхьажьырэм кIэлэегъаджэхэри, кIэлэеджакIохэри егъэгушIох.
ДЕЛЭКЪО Анет.