ТапэкIи Iоф зэдашIэщт
Лъэпкъ проектэу «Предпринимательствэ цIыкIур ыкIи гурытыр, унэе предпринимательствэм IэпыIэгъу фэхъугъэныр» зыфиIорэм игъэцэкIэн къыдыхэлъытагъэу зипродукцие IэкIыбым щыIузыгъэкIыхэрэм ыкIи экспортым фытегъэпсыхьэгъэ предприятиехэм IэпыIэгъу афэхъугъэнымкIэ амалхэу щыIэхэм зыщатегущыIэгъэхэ зэхэсыгъо Мыекъуапэ дэт Гупчэу «Мой бизнес» зыфиIорэм щыкIуагъ. Ащ хэлэжьагъэх Адыгэ Республикэм Iоф щызышIэрэ предприятие инхэм ыкIи гурытхэм япащэхэр.
Iофтхьабзэм кIэщакIо фэхъугъэх АР-м экспортым IэпыIэгъу фэхъугъэнымкIэ и Гупчэ, Адыгеим экономикэ хэхъоныгъэмкIэ ыкIи сатыумкIэ и Министерствэ ыкIи Урысые экспорт гупчэм икъутамэу Краснодар дэтыр.
ЗэIукIэгъу-зэдэгущыIэгъум пшъэрылъ шъхьаIэу иIэр бизнесым ыкIи предприятиехэм япащэхэр хэбзэ къулыкъухэм ялIыкIохэм занкIэу адэгущыIэнхэ амал яIэныр, къэралыгъо IэпыIэгъур къызфагъэфедэн алъэкIыныр, шъолъыр экспортым хэхъоныгъэ ышIыныр, нэмыкIхэри.
Непэрэ мафэм ехъулIэу чIыфэ тыным, страхованием, сертификацием, нэмыкI лъэныкъохэм япхыгъэу Iофэу ашIэрэм, предприятиехэм, бизнесым хэщагъэхэм IэпыIэгъу афэхъугъэнымкIэ амалхэу щыIэхэм къатегущыIагъ Урысые экспорт гупчэм икъутамэу Краснодар дэтым ипащэу Владислав Есиныр.
Инвестиционнэ проектхэм IэпыIэгъу афэхъугъэнымкIэ амалыкIэхэу щыIэхэм ыкIи ахэр зэрэбгъэфедэнхэ плъэкIыщтым ягугъу къышIыгъ АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур.
ТапэкIи зэпхыныгъэ яIэу зэдэлэжьэнхэм, къэбархэмкIэ зэхъожьынхэм мэхьанэшхо иIэу лъэныкъохэм зэдаштагъ.
Хэхъоныгъэ ышIыгъ
Лъэпкъ проектэу «Предпринимательствэ цIыкIур ыкIи гурытыр, унэе предпринимательствэм IэпыIэгъу фэхъугъэныр» зыфиIорэр зэрифэшъуашэу гъэцэкIэгъэным республикэм мэхьанэшхо щыраты. Ащ изы лъэныкъоу щыт зипродукцие IэкIыбым щыIузыгъэкIыхэрэм IэпыIэгъу афэхъугъэныр.
Зэфэхьысыжьхэм къызэрагъэлъагъорэмкIэ, 2021-рэ илъэсым Iоныгъом и 1-м ехъулIэу, къэралыгъо IэпыIэгъур зыIукIэгъэ Адыгеим Iоф щызышIэрэ предпринимательствэ цIыкIум ыкIи гурытым илIыкIуи 9-мэ доллар миллион 12,5-рэ зытефэрэ зэзэгъыныгъэхэр адашIыгъэх. Ахэм къыдагъэкIыгъэ продукциехэр ащагъэх Германием, США-м, Казахстан, Киргизием, Украинэм, Абхъазым.
Ащ ишIуагъэкIэ экспортым IэпыIэгъу фэхъугъэнымкIэ Гупчэм 2021-рэ илъэсым телъытэгъэ иплан процент 232-кIэ гъэцэкIагъэ хъугъэ. Мы IофшIэныр республикэм щылъагъэкIуатэ.