ШIуагъэ къэзытырэ Iофтхьабз
Урысые марафонэу «Дни зеленых действий» зыфиIорэм Мыекъуапэ хэлажьэ. Мыщ къыдыхэлъытагъэх тыкъэзыуцухьэрэ дунаир къэухъумэгъэным ыкIи къызэтегъэнэжьыгъэным афытегъэпсыхьэгъэ Iофтхьабзэхэм язэхэщэн.Республикэм икъэлэ шъхьаIэ марафоныр шэмбэт шIыхьафымкIэ къызэIуахыгъ. Волонтерхэм Шъхьагуащэ инэпкъхэр агъэкъэбзагъэх, пыдзэфэ кубометрипшI пчъагъэ аугъоигъ, нэужым хэкIыр шъолъыр операторым Iуищыгъ.
Мы мэфэ дэдэм лицееу N 35-м тхылъыпIэ килограмм 200 ыкIи пластикэ килограмм 35-рэ щаугъоигъ, нэужым ахэр икIэрыкIэу къыдагъэкIыжьыщтых.
Iоныгъом и 6-м лицееу N 34-м къыпэIулъ чIыпIэм къырым сэснэй чъыг цIыкIу 50 щагъэтIысыгъ.
Экологическэ Iофтхьабзэу «Дни зеленых действий» зыфиIорэр лъагъэкIуатэ, ащ шъухэлэжьэнэу зэхэщакIохэм шъукъырагъэблагъэ. Сурэтыр Мыекъопэ къэлэ администрацием ипресс-къулыкъу ий.