Федеральнэ фэгъэкIотэнхэр зыгъэфедэн зылъэкIыщтхэм ащыщых сэкъатныгъэ зиIэхэр, кIэлэцIыкIоу сэкъатныгъэ зиIэхэр, Хэгъэгу зэошхом хэлэжьагъэхэр, зэо-зэпэуцужьхэм яветеранхэр, Ленинград къызадзыхьэм хиубытагъэхэр, нэмыкIхэр. Ахэм социальнэ фэIо-фашIэхэр афагъэцэкIэщтхэмэ, хьауми ащ ычIыпIэкIэ ахъщэ къафэкIонэу фаехэмэ мазэу тызыхэтым и 30-м шIомыкIэу къагъэнэфэн фае. ЛъэIу тхылъым къихьащт илъэсым ищылэ мазэ и 1-м щыублагъэу, ар къэзытыгъэм ишIоигъоныгъэ зэрехъо­кIыфэ кIуачIэ иIэщт.

2021-рэ илъэсым имэзае и 1-м къыщегъэжьагъэу социальнэ фэIо-фашIэхэм «янабор» сомэ 1211-рэ чапыч 66-рэ ахъщэу къыщыдэлъытагъэ хъугъэ. Ащ щыщэу сомэ 933-рэ чапыч 25-р Iэзэгъу уцхэм е сэкъатныгъэ зиIэ кIэлэцIыкIум гъомылапхъэу ышхын­хэ фаехэм, соми 144-рэ чапыч 37-р IэзэпIэ-гъэпсэфыпIэм ипутевкэ, соми 134-рэ чапычи 4-р ащ узэрэкIощт мэшIокугъогу е нэмыкIэу къалэхэр зэзыпхырэ транспортхэм апай.

Социальнэ фэIо-фашIэхэр фагъэцэкIэщтхэмэ хьауми ащ ычIыпIэкIэ ахъщэ къыфэкIощтымэ къыхэзыхыгъэу, ар зэрихъокIын гухэлъ зимыIэхэм зыпари атхын ищыкIагъэп. Зэблихъумэ зышIоигъохэр е мыгъэ апэрэу ахэр ыгъэфедэнхэу фитыныгъэ къызэратыгъэхэр арых лъэIу тхылъ зытынхэ фаер.

Ар ПенсиехэмкIэ фондым икъулыкъоу цIыфхэм Iоф адэзышIэрэм е МФЦ-м ащыптын плъэкIыщт, ау пэшIорыгъэшъэу зыхябгъэтхэн фае. Фондым иинтернет нэкIубгъо «унэе кабинет» щызиIэхэм ащ щатымэ хъущт, къэралыгъо фэIо-фашIэхэм япортали бгъэфедэн амал щыI.

Адыгеим федеральнэ фэгъэкIотэнхэм къахиубытэу исыр нэбгырэ 40114-рэ мэхъу. УФ-м ПенсиехэмкIэ ифонд и Къутамэу АР-м щыIэм ипресс-къулыкъу.