«Налмэсым» ищытхъу хегъахъо

Пшызэ и Къэралыгъо академическэ къэзэкъ хор икъэшъуакIохэмрэ Адыгэ Республикэм и Къэралыгъо академическэ къэшъокIо ансамблэу «Налмэсымрэ» зэгъусэхэу Iоныгъом и 10-м Краснодар концерт къыщатыщт.

Хэгъэгум щыпсэухэрэ лъэпкъхэм язэфыщытыкIэхэр гъэпытэгъэнхэмкIэ «Урысыем икунакхэр» зыфиIорэ Iоф­тхьабзэм хахьэхэрэ концертхэр зэгъу­нэгъу творческэ купхэм къатых.

— Къэзэкъ хорымрэ «Налмэсымрэ» япчыхьэзэхахьэ Iоныгъом и 2-м Мые­къуа­пэ гъэшIэгъонэу щыкIуагъ, — къыти­Iуагъ Пшызэ искусствэхэмкIэ изаслуженнэ IофышIэшхоу, Адыгэ Республикэм изаслуженнэ артисткэу Елена Арефьевам. — Сэ Мыекъуапэ сыщапIугъ, сыщеджагъ. Къэзэкъ хорым ибалетмейстерэу сыщыт. «Налмэсым» ныбджэгъу­ныгъэ дытиI. Тызэгъусэу лъэпкъ къа­шъохэр тэгъэуцух, гум имыкIыжьыщт пчыхьэзэхахьэхэр зэхэтэщэх. Концертым синэIосэ нэбгырабэ щыслъэгъугъ.

— Концертым изэхэщэн чанэу хэлэжьагъэх Тхьаркъохъо Азэмат, Гъу­кIэлI Налбый, нэмыкIхэри, — зэдэгущыIэгъур лъегъэкIуатэ къэзэкъ хорым ипащэу, Урысыем, Украинэм, Адыгэ Республикэм культурэмкIэ язаслуженнэ IофышIэу, Адыгеим иныбджэгъушIоу Анатолий Арефьевым. — Къэзэкъ хорым ихудожественнэ пащэу, композитор цIэрыIоу Виктор Захарченкэр Мыекъуапэ къэкIон ылъэкIыгъэп, исэлам къышъосхыжьынэу къысэлъэIугъ. «Налмэсымрэ» къэзэкъ хорымрэ ятворчествэ нахь зэпэблагъэ зэрэхъурэм тизэфыщытыкIэхэр егъэпытэх.

Урысыем, Адыгеим янароднэ артистэу, зэлъашIэрэ композиторэу Нэхэе Ас­лъанрэ тхэкIо цIэрыIоу МэщбэшIэ Исхьакърэ зэдаусыгъэу «Орэдыжъ» зыфиIорэр ным игумэкI-гупшысэхэм афэгъэхьыгъ. Орэдыр къэзэкъ хорым къеIо. «Налмэсым» ихудожественнэ пащэу Хъоджэе Аслъан адыгэ орэдышъом техыгъэ къашъоу «Уджыр» ыгъэуцугъ, ар къэзэкъ хорым икъэшъуакIохэм къашIы. «Налмэсми» къэзэкъ къашъохэр къегъэлъагъох.

Зэфещэх

— Лъэпкъ искусствэм тызэрэзэфищэрэм титворчествэ къегъэбаи, — къы­тиIуагъ Хъоджэе Аслъан. — Пэсэрэ лъэхъаным тилъэпкъэгъухэм шэн-хабзэу яIагъэр къашъохэмкIэ цIыфхэм алъытэгъэIэсы. «Налмэс-Налкъутэм» нэмыкI къашъохэри згъэуцунхэу симурад.

Мыекъуапэ щыкIогъэ концертыр къы­заухым, артистхэр ежь-ежьырэу къызэ­хэуцуагъэх. Нэпэеплъ сурэтыр атетхынэу къытэлъэIугъэх. Тарихъым инэкIубгъохэм ащыщ хъугъэ сурэтыр «Адыгэ макъэм» къыщыхэтыуты зэрашIоигъор къытэзыIуа­гъэхэр къахэкIыгъэх.

Краснодар щеплъыщтых

«Налмэсымрэ» Пшызэ икъэзэкъ хорырэ ятIонэрэ концертэу Iоныгъом и 10-м зэхащэщтыр Краснодар щыкIощт. Краснодар пэблагъэхэ адыгэ къуа­джэхэм, Адыгэкъалэ ащыпсэухэрэм шэнышIу зэрафэхъугъэу, концертым ягуапэу еплъыщтых, артистхэм къяжэх.

— Зэкъошныгъэм ипчыхьэзэхахьэу Краснодар щыкIощтым тыфэхьазыр, — къытиIуагъ Адыгэ Республикэм инароднэ артисткэу Хьакъуй Анжеликэ. — Адыгэ къуаджэхэм къарыкIыщтхэм зэхахьэр къагъэдэхэщтэу сэлъытэ. Ахэр Iэгу къызэрэтфытеохэрэр, къызэрэтпэгъокIыхэрэр зымыуасэ щыIэп. Урысхэр, къэзэкъхэр, нэмыкIхэри концертым еп­лъыхэзэ къызэрэтфэгушIохэрэм те­гъэгушхо… Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ зэхахьэхэм «Налмэсыр» ахэ­лажьэзэ, лъэпкъ искусствэм хэхъоныгъэу ышIыгъэхэр къегъэлъагъох.

Зэхахьэхэр гъэшIэгъоных

«Налмэсым» пчыхьэзэхэхьэ гъэшIэгъонхэр Iоныгъом иIэщтых. «Нартхэм ячIыгу» зыфиIорэ фестивалэу Къыблэм, Темыр Кавказым ащыпсэухэрэм яфес­тивалэу Мыекъуапэ щыкIощтым хэлэ­жьэщт.

Къыблэм илъэпкъхэм яфестивалэу культурэм, спортым яхьылIагъэу Къырым щызэхащэщтым «Налмэсыр» рагъэблэгъагъ. Iоныгъом и 25 — 26-м щыIэщт фестивалым искусствэм иIофышIэхэр чанэу хэлэжьэщтых.

Тарихъым ехьылIэгъэ зэхахьэр Iоныгъом и 30-м Мыекъуапэ щыкIощт, ащ «Налмэсым» концерт къыщитыщт.

Илъэс 85-рэ

«Налмэсыр» зызэхащагъэр илъэс 85-рэ зэрэхъугъэр ансамблэм игъэкIотыгъэу хигъэунэфыкIыщт. «Зы бзэ, зы хабзэ, зы лъэпкъ» зыфиIорэ концертыр «Налмэсымрэ» Къэбэртэе-Бэлъкъарым иансамблэ цIэрыIоу «Кабардинкэмрэ» зэгъусэхэу чъэпыогъум и 7-м Мыекъуа­пэ къыщатыщт, нэмыкI зэIукIэгъухэр иIэщтых.

Iоныгъом, чъэпыогъум «Налмэсым» ишIушIэ пчыхьэзэхахьэхэр Адыгэ Рес­публикэм икъуаджэхэм ащыкIощтых. Адыгеим имэфэкI зэхахьэхэм «Налмэсыр» ахэлэжьэщт, республикэм икъэралыгъо гъэпсыкIэ зэрэпытагъэр къащигъэлъэгъощт.

Опсэу, тилъапIэу «Налмэсыр»! О уигъэхъагъэхэм Адыгеим щытхъур къыфахьы, тарэгушхо.

ЕмтIылъ Нурбый.