Агъэфедэгъэ пластикым хэшIыкIыгъэ тетIысхьапIэхэр республикэм икъэлэ шъхьаIэ игупчэ къиуцуагъэх.

Мыекъуапэ иеджакIохэм пыдзафэхэр къаугъоигъэх. Проектэу «КIэугъоекIо правительствэм» къыдыхэлъытагъэу «Уцы­шъо Iофтхьабзэхэм ямафэхэр» цIэу зыфаусыгъэм къыхиубытэу пстэури рагъэкIокIыгъ.

ТетIысхьапIэ пэпчъ тетхагъ ар щыIэ хъунымкIэ зишIуагъэ къэкIуагъэхэр.

Шъугу къэдгъэкIыжьын, илъэ­сищкIэ узэкIэIэбэжьмэ гупчэм къызэрэрагъэуцогъагъэхэр пы­дза­фэхэр зэхашыпыкIыхэзэ зэратэкъощтхэ псэуалъэхэр. Ахэм афэдэхэр еджапIэхэмрэ кIэлэцIыкIу IыгъыпIэхэмрэ ящагухэм адагъэуцогъагъэх ыкIи сабыйхэми яшIуагъэ къагъэ­кIуагъ икIэрыкIэу къыдагъэкIы­жьыщтхэм апае ищыкIагъэр къэугъоигъэнымкIэ.

Лениным ыцIэ зыхьырэ гуп­чэм щагъэшIуагъэх гъэсэныгъэ зыщарагъэгъотырэ еджапIэхэм ачIэсхэу республикэм икъэлэ шъхьаIэ иэкологическэ Iофтхьабзэхэм чанэу ахэлэжьагъэхэр.

Мыекъопэ къэлэ администрацием ипресс-къулыкъу къызэритырэмкIэ, зэхащагъэхэм анахь иныр икIэрыкIэу агъэфедэжьырэ пыдзафэхэм яугъо­и­н­кIэ хабзэ хъугъэу рагъэкIокIырэ зэнэкъокъоу «ЭкоБитва» зыфиIорэр ары. ЯплIэнэрэ илъэс хъугъэу ар зэхещэ Мые­къопэ администрацием ипроект офисэу «КIэугъоекIо правительств» зыфиIорэм компаниеу «ЭкоСити» зыцIэр игъусэу.

Проектыр агъэцэкIэфэ анахь дэгъоу зыкъэзыгъэлъэгъогъэ еджапIэхэмрэ кIэлэцIыкIу Iыгъы­пIэхэмрэ ялIыкIохэм зэхэщакIо­хэм сертификатхэр аратыжьыгъэх. Ахэр – гурыт еджапIэу N 7-р, мыщ анахьыбэу тхылъы­пIэмрэ бжъэмрэ къыщаугъоигъ – тонн 12-м ехъу; кIэлэцIыкIу IыгъыпIэу N 4-р, къаугъоигъэр зэрэбэм игъусэу чанэу хэлэжьагъэх къэбарлъыгъэIэс IофшIэнми, килограмм 11650-рэ мыщ къыщаугъоигъэр.

2021-рэ илъэсым «ЭкоБит­вэм» кIэлэцIыкIу IыгъыпIэхэмкIэ анахь лъэш щыхъугъэр хэу­шъхьафыкIыгъэ коррекционнэ IыгъыпIэу зипсауныгъэкIэ щыкIагъэ зиIэхэр зычIэсхэу N 18-р ары. ЗэхэщакIохэм къызэраIуа­гъэмкIэ, мыщ чIэсхэм япчъагъэ емылъытыгъэу, нэбгырэ 56-рэ, учреждение 43-у зэнэкъокъугъэ­хэм анахьыбэ къаугъоиныр афызэшIокIыгъ.

ЕджапIэхэм ащыщэу къахэщыгъэр я 20-р ары. Зы мазэм къыкIоцI мыщ щеджэхэрэм килограмм 1800-рэ къаугъоигъ ыкIи апэ хъугъэх. ТекIоныгъэ къыдэзыхыгъэхэм ацIэкIэ къаугъоигъэ пластикым хэшIыкIыжьыгъэ тетIысхьэпIиплI Лениным игупчэ щагъэуцугъ. Мыхэм афэдэхэр Мыекъуапэ ищагухэу лъэпкъ проектэу «ПсэупIэр ыкIи къэлэ щыIакIэр» зыфи­IорэмкIэ зэтырагъэпсы­хьажьыгъэхэм адагъэуцуагъэх.

ХэкIыр зэхэпшыпыкIымэ шIуа­гъэу къытыщтыр джы пстэуми янэрылъэгъу — къэIотэгъэ къо­дыеу щымытэу, ар зэрэбгъэпсэолъэ­шъущтри мафэ къэс аушэтыщт.

ЯцIыкIугъом къыщыублагъэу зэхягъэшIыкIыгъэным мэхьанэу иIэр ины, ащ пае гъэсэныгъэм, творчествэм атегъэпсыхьэгъэ еджапIэхэми шIыкIэ зэфэшъхьаф­хэр агъэфедэх. Лъэхъаным ди­ш­тэрэ искусствэм и Гупчэу «Шпаргалкэм» зэхахьэм къыщишIыгъэ экологическэ пшысэр, кIэлэ-цIыкIу IыгъыпIэу N 4-м ыгъэуцугъэ театрализованнэ къэтынэу «Къэлэ къабзэр сэ къысще- жьэ!» зыфиIорэр ащкIэ щысэх.

Сурэтхэр Мыекъопэ къэлэ администрацием ипресс-къу­лыкъу иех.