Къэралыгъом ит гурыт еджапIэхэмрэ «IэпыIэгъу псынкIэмрэ» ятран­спорт зэблахъуныр, имыкъурэр къащэфыныр УФ-м и Президентэу Владимир Путиным пшъэрылъэу къыгъэуцугъэхэм ащыщых.

УФ-м иминистрэхэм я Кабинет зэхэсыгъоу джырэблагъэ иIагъэм къызэрэщаIуагъэмкIэ, 2021-рэ илъэсым техникэу къащэфыщтым сомэ миллиард 15,3-рэ Правительствэм пэ­Iуигъэхьащт. ЗэкIэмкIи еджапIэхэм апае автобус 4187-рэ ыкIи «IэпыIэгъу псынкIэм» пае автомашинэ 1624-рэ шъо­лъырхэм афатIупщынэу щыт.

ТранспортыкIэу аратыщтыр зэкIэмэ анахьэу къоджэ псэупIэхэм адэсхэм къызэрашъхьапэщтыр УФ-м и Правительствэ и Тхьаматэу Михаил Мишустиным къыхигъэщыгъ. АвтобусхэмкIэ кIэлэеджакIохэр еджапIэхэм якIолIэщтых, врачхэр сымаджэхэм игъом яплъынхэмкIэ «скорэхэр» IэпыIэгъу афэхъущтых.

Правительствэм ипащэ техникэр шъолъырхэм зэратырагощэщт шапхъэу агъэхьазырыгъэм дыригъэштагъ, мы лъэныкъомкIэ гухэлъэу ашIыгъэхэр икъоу пхырыщыгъэнхэм фытегъэпсыхьэгъэ пшъэрылъ гъэнэфагъэхэр къышIыгъэх.