Галина Алексеенкэм фэгъэхьыгъэу тхыгъэ ин къыдэхьагъ Кавказ заповедникыр зызэхащагъэр илъэс 80 зэрэхъугъэм ехъулIэу къыдагъэкIыгъэ тхылъэу «Книги памяти наших сердец» зыфиIорэм.

Галинэ ицIыкIугъом къыщегъэжьагъэу ятэу, мэзгъэкI дэгъугъэу, нэужым заповедникым идиректорыгъэу Николай Лаврентьевым къыIуатэхэрэ къэбархэм ядэIузэ, ежьыри цIыкIузэ къушъхьэхэмрэ мэзхэмрэ шIу ылъэгъугъагъэх. Ащ емы­лъытыгъэу, естествознаниемрэ географиемрэкIэ кIэлэегъаджэу еджагъ ыкIи Iоф ышIагъ. Илъэс заулэрэ Востоковедением иинститутрэ Москва дэт институтэу хэгъэгу зэфэшъхьафхэм Iоф ащызышIэщт дипломатхэр зыщагъэхьазырхэрэмрэ аIутыгъ.

Ятэ идунай зехъожьым Галинэ заповедникым Iоф щишIэнэу коллективым къыхэхьагъ. Апэрэ лъэхъаным заповедникым иIофышIэхэм ясабыйхэр зыщырагъаджэхэрэ еджэпIэ-интернатэу Мые­къуапэ дэтыгъэм икIэлэпIугъыгъ, етIанэ идиректорыгъ.

Илъэс 35-рэ Iоф ышIагъэу ар библиотекарь хъугъэ, тхылъеджэным сабыйхэр фигъасэщтыгъэх. Ащ фэшъхьафэу Кавказ заповедникым щызэхащэрэ ушэтын Iоф­тхьабзэм ахэлажьэщтыгъ, къушъхьэ лъагэ­хэм къащыкIыхэрэр шIэныгъэлэжьэу М. Д. Алтуховым икуп хэтэу къатхыхьагъэх.

Галина Алексеенкэр опсэуфэ заповедникри, ащ Iоф щызышIэхэрэри ыгу илъыгъэх, аIукIэщтыгъ, уасэ афишIы­щтыгъ. Ежьыри цIыфышIоу, IофышIэ чанэу, заповедникыр зыгу пымыкIыщтыгъэ лэжьакIоу ары зэрашIэщтыгъэр.

Тхылъэу зигугъу къэтшIыгъэм Галинэ къыткIэхъухьэрэ ныбжьыкIэхэм афигъэ­хьыгъэ гущыIэхэр дэтых: «Заповедникым гуфэбэныгъэу фытиIэм гъунэ иIэп. Тауж къикIыхэрэм а шIулъэгъур лъагъэкIуатэзэ, ежьхэм ясабыйхэми ахалъхьанэу сыфай. Заповедникыр жъугъэлъапIэ, шIу шъулъэгъу, чIышъхьашъор къэзыгъэдэхэрэ чIыпIэу ар тиI. Ащ псыхъохэр къыщежьэх, ахэр гъашIэм ылъапсэх».

Заповедникым хъарзынэщ Галина Алексеенкэр шIыхьафым хэлажьэзэ тырахыгъэ сурэтыр хэлъ. А мафэм ащ кордонэу Гъозэрыплъэ ежь ыцIэ зыхьырэ чъыг щигъэтIысхьэгъагъ.

Алексеенкэр псаугъэмэ, къихьащт илъэсым ыныбжь илъэс 95-рэ хъущтыгъ. (Тикорр.).