ГъогурыкIоныр щынэгъончъэным пае
Адыгэ Республикэм хэгъэгу кIоцI IофхэмкIэ иминистрэу Иван Бахиловыр мы мафэхэм зипчъэхэр къызэIузыхыгъэ Мыекъуапэ илицееу N 34-м щыIагъ.
Iофтхьабзэм хэлэжьагъэх гъогурыкIоныр щынэгъончъэнымкIэ Къэралыгъо автоинспекцием АдыгеимкIэ и ГъэIорышIапIэ ипащэ ипшъэрылъхэр зыгъэцэкIэрэ Мамыекъо Казбек, ведомствэм ипресс-къулыкъу ипащэу Гъомлэшк Байзэт, Мыекъопэ къэлэ администрацием инфраструктурэмкIэ иотдел ипащэу Виталий Загайко, нэмыкIхэри.
Гъэсэныгъэм иучреждение дэжь гъогурыкIоныр щынэгъончъэу щызэхэщэгъэным, кIэлэеджакIохэм, водительхэм шапхъэхэр амыукъонхэм, ащкIэ хэбзэухъумакIохэм япшъэрылъхэр зэрагъэцакIэрэм изэфэхьысыжьхэр шIыгъэнхэм къэзэрэугъоигъэхэр атегущыIагъэх.
КъызэраIуагъэмкIэ, мы еджапIэм урокхэр зыщырагъажьэхэрэр сыхьатыр 8.30-р ары. А уахътэр къэмысызэ ны-тыхэм якIэлэцIыкIухэр учреждением къыращалIэх. Ащ дэхьэгъуитIу иI, ау зэIухыгъэр зыр ары. Ащ къыхэкIыкIэ мы чIыпIэм машинабэ щызэрэугъои, шапхъэхэр аукъохэу къыхэкIы.
Иван Бахиловым гъогурыкIоныр щынэгъончъэнымкIэ Къэралыгъо автоинспекцием АдыгеимкIэ и ГъэIорышIапIэ ипащэхэм пшъэрылъ къафишIыгъ мы гумэкIыгъор дэгъэзыжьыгъэнымкIэ хэкIыпIэ къагъотынэу. Джащ фэдэу гъогурыкIоным ишапхъэхэр амыукъонхэм фэшI ДПС-м инаряд тедзэхэр мы гъэсэныгъэм иучреждение дэжь щытынхэу зэдаштагъ.
Тхьаркъохъо Адам.