2021-рэ илъэсым имэзибл пштэмэ, ежь-ежьырэу IофшIэн къызфэзгъотыжьыгъэхэм япчъагъэ 4369-м кIэхьагъ е проценти 181-рэ хъугъэ. МыщкIэ муниципальнэ образованиищмэ пэрытныгъэ аIыгъ: Мыекъуапэ — нэбгырэ 1589-рэ, Тэхъутэмыкъое районыр — 682-рэ ыкIи Мыекъопэ районыр — нэбгырэ 445-рэ.

— Шъолъыр проектым къыдыхэлъытагъэу, ежь-ежьырэу IофшIэн къызфэзгъотыжьыгъэ­хэм финанс IэпыIэгъу ягъэгъотыгъэнымкIэ фэгъэкIотэныгъэ­хэр афашIыгъэх, — къыщаIуагъ Адыгеим экономикэ хэхъоныгъэмкIэ и Министерствэ.

Ведомствэм къызэрэщыхагъэ­щыгъэмкIэ, ежь-ежьырэу Iоф­шIэн къызфэзгъотыжьыгъэхэм фэгъэкIотэныгъэ зиIэ микро­займхэр аратых, залог щыIэ зыхъукIэ, илъэсым телъытагъэу ащ проценти 6,5-рэ (зэзэгъыныгъэм зыщыкIэтхэгъэхэ мафэм ехъулIэу Урысыем и Банк ыгъэ­уцугъэ ставкэм шIокIырэп) пылъ, ащ етIани проценти 2,5-рэ ахэкIы.

Залог щымыIэ зыхъукIэ, процентыр 6,5-рэ мэхъу. Анахь ахъщэшхоу аратырэр сомэ мин 500-м ехъурэп, анахь макIэр къызщежьэрэр сомэ мин 50. Микрозаймыр къызэратыщтым ыныбжь илъэс 18-м щегъэжьагъэу 65-м шIокIы хъущтэп. ЧIыфэ мыинхэр зытырэ компаниеу «Адыгэ Республикэм предпринимательствэм IэпыIэгъу фэхъугъэнымкIэ и Фонд» къызэрэщаIуагъэмкIэ, 2021-рэ илъэсым шышъхьэIум и 1-м ехъулIэу ежь-ежьырэу IофшIэн къызфэзгъотыжьыгъэ нэбгыритфымэ яшIуагъэ арагъэкIыгъ, ахэм сомэ миллиони 2,6-рэ аратыгъ.

КъэбарлъыгъэIэс-упчIэжьэгъу ыкIи гъэсэныгъэ фэIо-фашIэхэм алъэныкъокIэ ежь-ежьырэу Iоф­шIэн къызфэзгъотыжьыгъэхэр зыгъэгумэкIырэ упчIэхэм яджэ­уапхэр оффлайн ыкIи онлайн шIыкIэхэм атетэу щызэрагъэгъо­тын алъэкIыщт Мыекъуапэ дэт Гупчэу «Мой бизнес» зыфиIорэм зыкъыфагъазэмэ.

Предпринимательствэ цIыкIум ыкIи гурытым ахэщагъэхэм мы мафэхэм ыпшъэкIэ зигугъу къэтшIыгъэ Фондым зыкъыфагъэзагъ сомэ миллион 13,4-рэ зытефэрэ микрозаймхэр ящыкIагъэу.

ЛъэIу тхылъитIур ежь-ежьырэу IофшIэн къызфэзгъотыжьыгъэхэм къатыгъ, ахэр зыфаехэр сомэ мин 200, ахъщэм техъо­рэр проценти 4. Мыекъуапэ ипредпринимательхэм ыкIи компаниехэм сомэ миллион 13,2-рэ зытефэрэ заявкиплI къатыгъ.

ГущыIэм пае, офисхэм ыкIи сатыушIыным пылъхэм апае мебель къыдэзыгъэкIырэ предприятием къыригъэкIокIырэ мылъкум хигъэхъоным фэшI сомэ миллиони 5 ищыкIагъэу Фондым зыкъыфигъэзагъ. Ахъщэ IэпыIэгъур программэу «Предпринимательствэ цIыкIум ыкIи гурытым инэмыкI субъект­хэр» зыфиIорэм къыдыхэлъытагъэу щыт, илъэсым телъытагъэу проценти 8,5-рэ техъо, мэзэ 24-кIэ ппщыныжьын фае.

— Компанием ипащэ къызэриIуагъэмкIэ, проектыр гъэцэкIагъэ зыхъукIэ, ахъщэ IэпыIэгъоу къаIукIагъэр материалхэм ящэфын ыкIи цIыфхэм лэжьапкIэр ятыгъэным апэIуагъэхьащт. Ащ ишIуагъэкIэ IофшIэпIэ чIыпIэхэр къызэтырагъэнэщтых, — къыщаIуагъ Адыгеим экономикэ хэхъоныгъэмкIэ и Министер- ствэ.

Тхьаркъохъо Адам.