Шхыныгъохэм ауасэ зыкъемыгъэIэтыгъэнымкIэ, ахэм ящэфын цIыфхэмкIэ нахь Iэрыфэгъу хъунымкIэ зишIуагъэ къакIохэрэм ащыщ ермэлыкъхэр.

Анахьэу агъэфедэрэ гъомылапхъэхэм ауасэ зыпкъ игъэтыгъэным ынаIэ тет Адыгеим и ЛIышъхьэ. ШIыкIэхэу къыхахыгъэхэм ащыщых зыгъэпсэфыгъо мафэхэм зэхащэрэ ермэлыкъхэу щэф-щэжьыным пылъхэр зыхамыгъэлажьэхэрэр. Ащ фэдэ къыхэмыкIыным пае уплъэкIунхэр зэхащэх, хэбзэIахь къулыкъухэри ахэм къахагъэлажьэх. Щэныр хэбзэгъэуцугъэхэм адиштэными ахэр алъэплъэх.

Адыгеим и ЛIышъхьэ къызэригъэнэфагъэмкIэ, ермэлыкъхэм япшъэрылъ шъхьаIэр уасэхэр нахь макIэ шIыгъэнхэр ары. Джащ ыпкъ къикIэу анаIэ зытырагъэтыхэрэр щапIэхэм ахэгъэхъогъэныр, шъолъырым гъо­мылапхъэхэм якъэгъэкIын, якъыдэгъэкIыжьын щыпылъхэ хъызмэтшIэпIэшхохэм Iоф адэшIэгъэныр арых.

Джырэ уахътэм республикэм ермэлыкъ зэхэщэпIэ 45-у щэпIэ 4620-мэ ателъытагъэмэ Iоф щашIэ, илъэсыр къызихьагъэм къыщыублагъэу ермэлыкъ 650-рэ фэдиз зэхащэгъах.

БлэкIыгъэ зыгъэпсэфыгъо мафэхэм республикэм икъэлэ шъхьаIэ щызэхащэгъэ ермэлыкъым цIыфхэр игъорыгъоу къе­кIуалIэщтыгъэх, ащ ежэхэрэри щыIэх уасэхэм агъэразэхэу, щыщэфэ зэпытхэу.

Ахэм зэу ащыщ МэшIодз Рахьмэт. «Къутырэу Гавердовскэм сыкъе­кIышъ ермэлыкъым бэрэ сыкъакIоу къы­хэкIы, — къытфиIотагъ ащ. — Лъэшэу сигуапэ гъомылэпхъэ зэ­фэшъ­хьафхэр бэдзэ­рыми нахь щыпыутэу къыз­IэкIэдгъэхьан зэрэтлъэ­кIырэр. Джырэ дунаим ащ мэхьанэшхо иI».

Урамэу Советскэм щызэхащэрэм нэмыкIэу Мыекъуапэ ибэдзэршIыпIэу «Казачий» зыфиIоу урамэу Юннатовым тетыми тхьаумафэ къэс ермэлыкъым хэлажьэхэрэм япродукцие пчэдыжьым сыхьатыр 7-м къыщыублагъэу мафэм 12-м нэс щащэщт.