Лъэпкъ проектэу «Щынэгъончъэу щыт гъогу дэгъухэр» зыфиIорэм ишIуагъэкIэ Тэхъутэмыкъое районым изы къоджэ гъогухэм ащыщ федеральнэ шапхъэхэм адиштэ хъущт.

Районым изэгъунэгъу псэупIитIур – Суповскэмрэ Отраднэмрэ – зэзыпхыхэрэ гъогур илъэси 10-м ехъугъ замыгъэцэкIэжьыгъэр. Къутырхэм ащыпсэухэрэм мызэу, мытIоу чIыпIэ администрацием а IофыгъомкIэ зыкъыфагъазэу къы­хэкIыгъ. ПIалъэу агъэнэфагъэм илъэскIэ нахьыжьэу агъэцэ­кIэжьыгъэ гъогур шэпхъэшIухэм адештэ. Подряднэ организациеу автомобиль гъогум игъэцэкIэ­жьын зыпшъэ дэкIыгъэр пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Тэхъутэмыкъое ДРСУ-р» ары. Зэзэгъыныгъэм къызэрэдилъы­тэрэм тетэу гъогум ышъхьашъо мыжъо гъэушкъоигъэ асфальтобетон тыралъхьагъ, ащ ишIуагъэ къэкIощт амыгъэцэкIэжьэу а гъогур бэрэ агъэфедэн алъэкIынымкIэ. Ащ нэфэшъхьафэу гъо­гум къекIолIэрэ зэхэкIыпIэхэри (ахэр 11 мэхъух) асфальткIэ агъапкIэх, гъогухэм атет тамыгъэхэр агъэкIэжьых, нэмыкIхэри рашIылIэх.

Зэхэубытагъэу къэпIон хъумэ, километри 2,66-рэ зикIыхьэгъэ гъогу Iахьым сомэ миллион 24,7-рэ пэIухьагъ.

«Адыгеяавтодорым» испециалистхэр гъэцэкIэжьынхэр зыщыкIогъэхэ чIыпIэм щыIа­-гъэх ыкIи лабораторнэ уплъэ­кIунхэр ашIынхэм пае асфальт зэхэгъэкIухьагъэм щыщ къыхахыгъ.

Лъэпкъ проектым ипрограммэ тегъэпсыхьагъэу 2021-рэ илъэсым Тэхъутэмыкъое районымкIэ гъогу Iахьи 5-у агъэ­нэфэгъагъэм ягъэцэкIэжьын аухыгъ, зэхэубытагъэу ахэр километри 8,9-рэ мэхъух. АсфальтыкIэр зытырагъэчъыхьагъэр квадрат метрэ мин 58-рэ фэдиз.

ГъогушI подряднэ организациехэм зэдегъэштэныгъэ зэра­хэ­лъыгъэм, «Адыгеяавтодорым» испециалистхэм уплъэкIун Iоф­хэр дэгъоу зэрэзэшIуахыгъэ­хэм яшIуагъэкIэ республикэр лъэпкъ проектым къыдилъытэрэ шапхъэ­хэм адиштэрэ автомобиль гъогухэр иIэнхэм тIэкIу-тIэкIузэ къыфэкIо.