Къэралыгъо программэу «Адыгэ Республикэм исоциальнэ-экономическэ хэхъоныгъ» зыфиIорэм къыхиубытэу Мыекъопэ районым «Дахъо – Лэгъо-Нэкъэ бгы тешъу» зыфиIорэ гъогоу километрэ 11,1-рэ хъурэм игъэкIэжьын щызэшIуахыгъ.

Ар я 3-рэ категорием рагъэ­хьагъ (зы сыхьатым километрэ 50 къыщакIун алъэкIыным тегъэ­псыхьагъэу, зэрыкIощтхэ гъогу IахьитIоу зэтеутыгъэу, Iахь пэпчъ метри 3,5-рэ, гъогубгъум метри 2,5-рэ яшъомбгъуагъэу).

Проектым къыдыхэлъытагъэх: гъогум ыпкъ изэблэхъун, къэшIыхьагъэхэр Iугъэуцогъэнхэр, къушъхьэхэм къяхырэр къытемыхьаным пае Iофтхьабзэхэр, гъогум изэтегъэпсыхьан, джащ фэдэу къэуцупIищэу цIыфхэм зызщаплъыхьан алъэкIыщтхэр ыкIи аварие къэмыхъоу къэуцунхэм пае зыщыдэчъэхышъущтхэр. Ахэм хэкIитэкъупIэхэр ащагъэуцугъэх, тетIысхьапIэхэр аIуагъэуцощтых.

Зэтегъэпсыхьажьын IофшIэнхэм апэIухьанэу агъэнэфэгъагъэр сомэ миллион 474,585-рэ, пIалъэр — 2020 — 2021-рэ илъэсых.

2020-рэ илъэсым сомэ миллион 301,643-рэ агъэфедагъ, 2021-рэ илъэсымкIэ къэнагъэр сомэ миллиони 155,860-рэ.

ПсэолъэшI-гъэцэкIэжьын Iоф­шIэнхэмкIэ контрактыр 2020-рэ илъэсым агъэпсыгъ, псэуалъэм итын 2021-рэ илъэсым ишы­шъхьэIу-Iоныгъо мазэхэм зэшIуа­хынэу агъэнэфэгъагъ. Джырэ уахътэм ехъулIэу ар икъоу агъэцэкIагъ.

Аужырэ уахътэм Адыгеим зекIо къакIохэрэм япчъагъэ нахьыбэ хъугъэ, тичIыопс ашIогъэшIэгъон, ашIодах. ЗекIоным зегъэушъомбгъугъэным пае инфраструктурэм изэтегъэпсы­хьани мэхьанэшхо республикэм ипащэхэм раты. Гъогухэм яшIын, язэтегъэпсыхьан ащкIэ мэхьанэшхо иI. Зигугъу къэтшIыгъэ гъогу Iахьыр аухыгъэу, джырэ уахътэм дэлажьэх Гъозэрыплъэ­рэ Лэгъо-Накъэрэ зэзыпхыщтхэм.

— ТичIыопс идэхагъэ тиягъэ етымыгъэкIэу, экологием зэрар етымыхэу къызэтедгъанэзэ пшъэрылъэу тиIэхэм такъыфэкIо. ЗекIохэм, Адыгеим щыпсэухэрэм языгъэпсэфыгъо уахътэ дэгъоу, агу къэкIыжьэу зэхэщэгъэным пае Iэрыфэгъу афэхъущт инфраструктурэр лъэныкъо зэфэшъхьафыбэкIэ тыкъекIуалIэзэ тэ­гъэпсы, — къыщыхигъэщыгъ Адыгеим и ЛIышъхьэ Лэгъо-Нэкъэ зыгъэ­псэфыпIэм игъэпсын фэгъэхьыгъэ зэзэгъыныгъэм кIатхэхэ зэхъум.