УФ-м и Президентэу Владимир Путиныр, инфляциер пэшIорыгъэшъэу къырадзэгъагъэхэм зэрашIокIыгъэм ыпкъ къикIыкIэ, пенсионерхэм сомэ мин пшIырыпшI, дзэм къулыкъу щызыхьыхэрэм ыкIи хэбзэухъумэкIо къулыкъухэм ясатырхэм ахэтхэм нэбгырэ пэпчъ сомэ мин 15 зэтыгъоу ятыгъэным кIэщакIо фэхъугъ.

УФ-м и Премьер-министрэу Михаил Мишустиным министрэхэм я Кабинет изэхэсы­гъоу тхьамэтагъор зыщызэрихьагъэм къызэрэщиIуагъэмкIэ, мы IэпыIэгъум пае сомэ миллиард 430-м ехъу къэралыгъом къы­тIупщыгъ. Пенсионерэу Iоф зымышIэжьхэрэри, IофшIапIэхэм аIутхэри, сэкъатныгъэ зэриIэм е унагъор зыIыгъыгъэр дунаим зэрехыжьыгъэм фэшI агъэнэфагъэр къызфакIохэрэри мыщ къыхеубытэх.

Банкым счет щызиIэу, пенсиер ащ тетэу къызIэкIахьэхэрэм якартэхэм Iоныгъом и 2-м ахъщэр къарыхьагъ. Ар нэбгырэ миллион 30,2-рэ мэхъу, сомэ миллиард 302-рэ ащ пэIухьагъ. Пенсионерэу почтэм е нэмыкI организациеу пенсиер аIэкIэзгъахьэрэм пенсиер къызфихьыхэрэм блэкIыгъэ бэрэскэшхом афатIупщынэу ра­гъэжьагъ. Ахэр нэбгырэ миллион 12,5-рэ мэхъух, сомэ миллиарди 125-рэ зэкIэмкIи аратыщтыр.

УФ-м и Правительствэ и Тхьаматэ игуадзэу Татьяна Голиковам къызэриIуагъэмкIэ, дзэ къулыкъум ыкIи хэбзэухъу­мэкIо къулыкъухэм яветеранхэм афагъэнэфэгъэ сомэ мин пшIырыпшIыр, непэ къулыкъу зы­хьыхэрэм зэтыгъоу къаратыщт мин 15-р афа­тIупщынэу рагъэ­жьагъ. Пенсионерхэм аратыщтым пае Правительствэм сомэ миллиард 21-рэ къыгъэнэфагъ, адрэхэм IэпыIэгъоу афэкIощтым пэIуагъэхьащтыр, Татьяна Голиковам къызэриIуагъэмкIэ, федеральнэ органэу зэпхыгъэ­хэм афатIупщыгъах.

Президентым ахъщэ тынэу къыгъэнэфагъэхэр зытефэхэрэм зыпари тхылъ агъэхьазырын ищыкIагъэп, ведомствэу зэпхыгъэхэм тхылъэу аIэкIэлъхэм къапкъырыкIыхэзэ зэпстэур агъэпсыгъ.