Илъэс 60 ыкIи нахьыбэ зыныбжьхэу прививкэр е ащ иапэрэ хэлъхьагъу языгъэшIыгъэхэу Адыгеим щыпсэухэрэм зэтыгъо ахъщэр зыщаратыщт уахътэр афылъагъэкIотагъ.

Пенсионерхэу вакцинациер зыкIугъэхэм къатефэрэ сомэ 500-р мы илъэсым ишэкIогъу мазэ и 1-м нэс къаратыщт. Iоныгъо мазэм и 1-м нэс коронавирусым пэшIуекIорэ вакцинэр зыхязыгъэлъхьэгъэ пенсионерхэм 2021-рэ илъэсым зэтыгъо ахъщэр къызэраратыщт шIыкIэм Адыгеим и ЛIышъхьэ пшъэрылъ зэрафишIыгъэм тетэу АР-м иминистрэхэм я Кабинет хэплъэжьыгъ. Ахъщэ тыным социальнэ мэхьанэу иIэр къыда­лъыти, унашъо ашIыгъ шэкIогъум и 1-м нэс пIалъэр лъыгъэ­кIотэгъэнэу. Мылъкур къаратыным пае вакцинэр е ащ иапэрэ Iахь зыхалъхьэгъэ пенсионерхэм шэкIогъу мазэм и 1-м нэс АР-м IофшIэнымкIэ ыкIи социальнэ ухъумэнымкIэ и Гупчэ е ащ икъу­тамэхэу цIыфыр зыщыпсэурэ чIыпIэм итхэм зафагъэзэн фае мыщ фэдэ тхылъхэр аIы­гъхэу:

— паспортым техыгъэ тхьапэр;

— вакцинациер зэракIугъэр къэзыушыхьатырэ тхылъым те­хыгъэ сурэтыр.

Тхылъхэр джащ фэдэу арахьылIэн алъэкIыщт МФЦ-хэм ягупчэ IофшIапIэхэм, псэупIэ чыжьэхэм адэсхэм «Мои документы» зыфиIорэ къулыкъум икъутамэу адэтхэм. АР-м Iоф­шIэнымкIэ ыкIи социальнэ ухъумэнымкIэ и Гупчэ иIофышIэхэр псэупIэ чыжьэхэм макIох цIыфхэм лъэIу тхылъхэмрэ агъэхьазырыгъэ тхьапэхэмрэ къаIахынхэм пае.

Iоныгъо мазэм иапэрэ мафэ­хэм яхъулIэу ахъщэ тыныр нэбгырэ 3640-рэ фэдизмэ сомэ 1818,5-м ехъоу аIэкIагъэхьагъ. Джыри нэбгырабэмэ ар къызфагъэфедэн алъэкIыщт.