КIэлэеджакIохэм шIэныгъэ тедзэ зыщарагъэгъотыщт гупчэхэр мы мафэхэм Мыекъуапэ къыщызэIуахыгъэх. Ахэр гурыт еджапIэу N 17-м щагъэпсыгъэ технопаркэу «Кванториум» зыфиIорэмрэ поселкэу Севернэм дэт гурыт еджапIэу N 27-м къыщызэIуахыгъэ «Точка роста» зыцIэмрэ.

Лъэпкъ проектэу «Гъэсэныгъэм» ифедеральнэ проектэу «Непэрэ еджапIэр» зыфиIорэм ишIуагъэкIэ технопаркэу «Кванториумыр» агъэпсыгъ. Федеральнэ бюджетым къыхэхыгъэ сомэ миллион 21-рэ ыкIи республикэ бюджетым щыщ сомэ мин 213-рэ ащ пэIуагъэхьагъ. Гупчэм икъызэIухын мэфэкI шIыкIэм тетэу кIуагъэ. Ащ хэлэжьагъэх АР-м гъэсэныгъэмрэ шIэныгъэмрэкIэ иминистрэ игуадзэу Евгений Лебедевыр, Мыекъопэ къэлэ администрацием ипащэ ипшъэрылъхэр зыгъэцэкIэрэ Сергей Стельмах, Мыекъуапэ инароднэ депутатхэм я Совет итхьаматэу Джарымэкъо Азмэт, гъэсэныгъэмкIэ къэлэ Комитетым илIыкIохэр.

— КIэлэеджакIохэм гъэсэныгъэ тедзэ зыщарагъэгъотын алъэкIыщт площадкэу мыр щыт, аужырэ шапхъэхэм адештэ. Лъэныкъо зэфэшъхьафхэмкIэ ныбжьыкIэхэм шIэныгъэ агъотыщт, — еIо Мыекъопэ администрацием ипащэ ипшъэрылъхэр зыгъэцэкIэрэ Сергей Стельмах.

Гупчэм фатIупщыгъэ квадратнэ метрэ 300-р зэрифэшъуашэу зэтырагъэпсыхьажьыгъ, хэушъхьафыкIыгъэ мебель, Iэмэ-псы­мэхэр чIагъэуцуагъэх. Пчэдыжьрэ биологиемкIэ, физикэмкIэ, химиемкIэ ыкIи технологиехэмкIэ ныбжьыкIэхэм яшIэныгъэхэм ахагъэхъощт. Пчыхьэрэ гурыт еджапIэм чIэсхэм ямызакъоу, нэмыкIхэм къарыкIыхэрэри рагъэджэщтых.

Мы мэфэ дэдэм лъэпкъ проектэу «Гъэсэныгъэм» епхыгъэ проектэу «Непэрэ еджапIэр» зыфиIорэм къыдыхэлъытагъэу поселкэу Севернэм дэт гурыт еджапIэу N 27-м «Точка роста» зыфиIорэ гупчэр къыщызэIуа­хыгъ. Естественнэ ыкIи техническэ лъэныкъохэмкIэ, купым хэтхэу Iоф ашIэнымкIэ ыкIи нэмыкIхэмкIэ шIэныгъэ ащ щарагъэгъотыщт.

Зэтырагъэпсыхьэгъэ классхэм химиемкIэ, хьисапымкIэ, биологиемкIэ ыкIи нэмыкI предметхэмкIэ яшIэныгъэхэм ащыхагъэ­хъощт. Мыщ Iоф щызы­шIэрэ кIэлэегъаджэхэм хэушъхьафыкIыгъэ егъэджэнхэр акIугъэх.

— Лъэпкъ проектым тыхэлажьэзэ гурыт еджапIэхэм мыщ фэдэ гупчэхэр зэращыдгъэ­псыхэрэм мэхьанэшхо иI. НыбжьыкIэ пэпчъ аужырэ шапхъэ­хэм адиштэрэ технологиехэр ыгъэфедэхэзэ ишIэныгъэхэм ахигъэхъон амал иIэн фае. Фе­деральнэ программэхэм яшIуа­гъэкIэ Iэмэ-псымакIэхэр зэдгъэгъотыгъэх. Джыри IофшIэныр лъыдгъэкIотэщт. 2022-рэ илъэсым Мыекъуапэ джыри гупчитIу къыщызэIутхыщт, — еIо Сергей Стельмах.

ДЕЛЭКЪО Анет. Сурэтыр Мыекъопэ администрацием исайт къырахыгъ.