Социальнэ мэхьанэ зиIэ проектхэр
УФ-м и Общественнэ палатэ изэнэкъокъоу «Мой проект – моей стране» зыфиIорэм хэлэжьэщтхэм тхылъхэр зыщатыщт пIалъэр Iоныгъом и 13-м нэс лъагъэкIотагъ.
Мыщ текIоныгъэр къыщыдэзыхыхэрэм япроект епхыгъэ Iофхэм апэIуагъэхьанэу сомэ мин 200 зырыз ыкIи диплом къаратыщт. Зэнэкъокъум илъэныкъохэм ащыщ узэрэхэлэжьэщтым фэгъэхьыгъэ тхылъыр интернет сайтэу oprf.ru е нэкIубгъоу oprf.ru/my-project зыфиIохэрэм защыбгъэунэфымэ, онлайн шIыкIэм тетэу птын плъэкIыщт.
Проектыр мы уахътэм игъоу щытмэ, общественнэ мэхьанэу иIэр, мыкоммерческэ организацие авторым зэпхыныгъэ дыриIэмэ, хэхъоныгъэхэр ышIынхэ ылъэкIыщтмэ, кIэу зыгорэ къыдэлъытагъэмэ ары уасэ зэрэфашIыщтхэр.
Зэнэкъокъум псэушъхьэхэм якъэухъумэн, социальнэ лъэныкъом, спортым ыкIи псауныгъэмкIэ зишIуагъэ къэкIощт псэукIэм, ныбжьыкIэхэр кIэщакIо зыфэхъугъэхэм, ныгъом, тыгъом ыкIи кIэлэцIыкIугъом IэпыIэгъу афэхъугъэным, наукэм, культурэм хэхъоныгъэхэр ягъэшIыгъэнхэм афытегъэпсыхьэгъэ проектхэр хагъэлажьэх.
Джащ фэдэу медицинэм, экологием афэгъэзагъэхэр кIэщакIо зыфэхъугъэхэм заушъомбгъуным, общественнэ лъыплъэным исистемэ хэхъоныгъэхэр ышIынхэм, тарихъ шIэжьым ыкIи патриоти-ческэ пIуныгъэм афытегъэпсыхьагъэхэми хъущт.
Илъэсэу тызхэтым ишэкIогъу мазэ щыIэщт форумэу «Сообщество» зыфиIорэм зэнэкъокъум изэфэхьысыжь къыщашIыщт, текIоныгъэр къыщыдэзыхыгъэхэр щагъэшIощтых.
УФ-м и Общественнэ палатэ иинтернет нэкIубгъоу https:www.oprf.ru/news/moy-proekt-moey-stane-priem-zayavok-na-konkurs-obshchestennoy-palaty-rosii-prodlen зыфиIорэм зэнэкъокъум икъэбар нахь игъэкIотыгъэу ишъулъэгъощт.