Терроризмэм пэшIуекIорэ бэнэны­гъэмкIэ зэдегъэштэныгъэм и Мафэ зыщыхагъэунэфыкIырэм тефэу ты­гъуасэ Адыгеим патриотическэ Iоф­тхьэбзэ заулэ щызэрахьагъ.

Мыекъуапэ щызэхащэгъэ Iофтхьабзэхэм зыкIэ ащыщ Урысыем и ЛIыхъу­жъэу, старшэ лейтенантэу Владислав Долониным исаугъэт икъызэIухын. Уры­сыем и ЛIыхъужъ зы­чIэсыгъэ гурыт еджапIэу N 3-м ар щагъэуцугъ.

Урысые Федерацием и ЛIыхъужъ исаугъэт икъызэIухын фэгъэхьыгъэ зэха­хьэу щыIагъэм хэлэжьагъ Адыгэ Республикэм и ЛIышъхьэу КъумпIыл Мурат. Джащ фэдэу щыIагъэх я 49-рэ дзэм ипащэ игуа­дзэу Алексей Полюхович, Адыгэ Республикэм и Къэралыгъо Совет — Ха­сэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, Адыгэ Респуб­ликэм ихэбзэухъумэкIо къулыкъухэм яIэшъхьэтетхэр, Урысые Федерацием и МО Къыблэ дзэ коимкIэ илIыкIохэр, Адыгэ Респуб­ликэм иминистрэхэм я Кабинетрэ Адыгэ Респуб­ликэм и Къэралыгъо Совет — Хасэмрэ ахэтхэр, В. А. Долониным иIахьыл­хэр, юнармейцэхэр, общественнэ организациехэм ялIыкIохэр.

Къэзэрэугъоигъэхэм за­къыфигъазэзэ Адыгэ Рес­публикэм и ЛIышъхьэ къы­зэриIуагъэмкIэ, терроризмэм пэшIуекIорэ бэнэныгъэм дезгъаштэхэрэм я Мафэ, Урысыем щыпсэу­хэрэм терроризмэм ыпкъ къикIэу фэхыгъэхэр агу къызщагъэкIыжьхэрэ ма­фэм мы Iофтхьабзэр зэрэ­тефагъэм мэхьэнэ гъэ­нэ­фагъэ иIэу щыт. Якъулыкъу пшъэрылъ агъэца­кIэзэ хэу­шъхьафыкIыгъэ ыкIи хэбзэухъумэкIо къулыкъу­хэм яIофышIэхэу фэхыгъэ­хэр агу къагъэкIы­жьых. Владислав Долониным иныбджэгъухэм якъэ­гъэнэ­жьын пае ыпсэ ытыгъ.

В. Долониныр дзэ къулыкъушIэ унагъом къихъу­хьагъ, 1991-рэ илъэсым Владикавказ дэт дзэ коман­днэ училищыр къыу­хыгъ. Дзэ пшъэрылъэу иIэр зэрифэшъуашэу ащ ыгъэцэкIагъ, илъэс 26-рэ ехъу ымыныбжьэу 1995-рэ илъэ­сым гъэтхапэм Темыр Кав­­казым щыкIогъэ Iэшэ зэпэуцужьныгъэм ар щы­фэхыгъ.

«ЕгъэшIэрэу ныбжьыкIэу ар къэнэжьыщт. Тихэгъэгу инэмыкI лIыхъужъхэм егъэ­шIэрэу ар къахэнэщт.

Тэ тызыфаер тиныбжьыкIэхэр Владислав фэдэхэм — бланэхэм, цыхьэшIэ­гъухэм, гушхуагъэ зы­хэлъхэм акIырыплъынхэр ары», — къыIуагъ КъумпIыл ­Мурат.

Адыгеим и ЛIышъхьэ къызэриIуагъэмкIэ, Свердловскэ хэкум идзэ частэу Владислав къулыкъур зыщихьыгъэм къыращыжьи саугъэтыр Мыекъуапэ къа­щэжьыгъ. Мы илъэсым мэлылъфэгъум кIалэм

иIа­хьылхэр къыкIэлъэIу­гъагъэх икъэлэ гупсэ саугъэт щыгъэуцугъэнымкIэ къадеIэнхэу. Республикэм, муниципалитетым якъулыкъухэр, Адыгеим шъолъыр гъэIорышIэнымкIэ и Гупчэ IэпыIэгъу къа­фэхъухи, ЛIыхъужъым исаугъэт ифэшъошэ чIыпIэ рагъэгъотыжьыгъ, Влади­слав Долониныр зыщеджэгъэ еджапIэм ищагу ар дагъэуцуагъ. Свердловскэ хэкуми а кIалэр щыгъупшэщтэп, къалэу Асбест иурамхэм ащыщ горэм ащ ыцIэ фаусыгъ. Ащ нэ­мыкIэу 2017-рэ илъэсым Урысыем и ЛIыхъужъэу Владислав Долониныр маркэу «Герои Российской Федерации» зыфиI­орэ серием хагъэхьагъ.

Я 49-рэ дзэм ипащэ игуадзэу Алексей Полюхович къэзэрэугъоигъэхэм закъыфигъазэзэ къы­хигъэщыгъ саугъэтыр зы­дэщыт чIыпIэр зэблэхъугъэнымкIэ республикэм ихэбзэ къулыкъухэм яшIуа­гъэ къызэрагъэкIуагъэм пае зэрафэразэр.

«Владислав лIыхъужъныгъэм итамыгъэу щыт, егъэшIэрэу ар цIыфхэм агу илъыщт», — къы­Iуагъ Адыгэ Республикэм и Къэралыгъо Совет — Хасэм идепутатэу, Темыр Кавазым щыкIогъэ уIэшыгъэ зэпэуцу­жьныгъэм лIыхъужъныгъэ щызезыхьагъэу, Урысыем и ЛIыхъужъ хъугъэ Цэй Эдуард. Владислав Долониным ышэу генерал-майорэу Николай До­лониным ыш зыфэдэгъэ цIыфыр, шэн-хабзэу хэ­лъы­гъэхэр къыIотагъэх.

Саугъэтым икъызэIухын зэрэщыхагъэунэфыкIы­гъэмкIэ, старшэ лейтенан­тэу Владислав Долониныр егъэшIэрэу цIыфхэм агу къинэщт, къыткIэхъухьэ­хэрэр я Хэгъэгу шIу алъэ­гъоу, фэшъыпкъэхэу пIугъэнхэмкIэ щысэ афэхъущтхэм ренэу ар ахэтыщт.

Дзэ пшъэрылъэу яIэр агъэцакIэзэ фэхыгъэхэр зэращымыгъупшэхэрэм ишыхьатэу зы такъикъэ шъыгъуагъэх. ИкIэухым Владислав Долониным исаугъэт къэгъагъэхэр кIэ­лъыралъхьагъэх.