УФ-м и Президентэу Владимир Путиным джэпсалъэу мыгъэ къышIыгъэм федеральнэ пособиехэм, пенсиехэм, социальнэ ахъщэ тынхэм, нэмыкI фэIо-фашIэхэм ягъэ­псын цIыфхэм нахь афэгъэпсынкIэгъэнэу, къамычъыхьэу, тхылъхэр къамыугъоихэу «зы шъхьаныгъупчъэ» шIыкIэкIэ зэшIуахын амал ятыгъэнэу Правительствэм пшъэрылъ къыщыфишIыгъагъ.

Президентым иунашъо игъэцэкIэнкIэ зы лъэбэкъоу щыт амалыкIэу къэралыгъо фэIо-фашIэхэм япортал къыты хъугъэр. ЦIыфым къызфигъэфедэн ылъэкIыщт фэIо-фа­шIэм, тхылъэу ащ пае ыгъэхьазырын фаехэм алъыхъужьын, уахътэ атыригъэкIодэжьын имыщы­кIэгъэжьэу ашIыгъ.

УФ-м экономикэ хэ­хъоныгъэхэмкIэ и Ми­нистерствэ къызэритыгъэм­кIэ, къэралыгъо фэIо-фа­шIэхэм япорталыр къы­зызэIупхыкIэ улъыхъожьын имыщыкIагъэу, ­фэIо-фашIэу о пшъхьэкIэ къыптефэрэри, пIалъэу е нэмыкI шапхъэу пылъхэри, тхылъэу ащ пае бгъэ­хьазырынхэ фаехэри щыгъэнэфэгъэщтых. ГущыIэм пае, псэупIэ-коммунальнэ фэIо-фашIэхэм апае субсидие къыуатын фаемэ, уигражданствэ, уиунагъо исым ипчъагъэ, псэупIэм итхагъэр зыфэдизыр къыдэлъытагъэхэу, тхылъэу бгъэхьазырын фаехэр итхэ­гъэщтых.

2023-рэ илъэсым нэс федеральнэ фэIо-фэшIэ 600-м ехъумэ апае мы порталыр цIыфхэм IэпыIэгъу къафэхъунэу ашIыщт, 2024-м нэс шъолъыр ыкIи муниципальнэхэри къы­рагъэхьащтых.