Лъэпкъ проектэу «Безопасные качественные дороги» зыфиIорэм къыдыхэлъытагъэу гъогу IахьиплI Шэуджэн рай­оным мыгъэ щагъэцэкIэжьыщт.

IофшIэнхэр мы муни­ципальнэ образованием игъогушI организацие егъэ­цакIэх. Мы уахътэм ащ къуаджэу Хьакуры­нэхьаблэ екIурэ автомобильнэ гъогум Iоф щешIэ. Зы къатэу мыжъокIэ-асфальт зэхэлъыр тыралъхьэгъах, къыкIэлъыкIорэ къатым игъэтIылъын фе­жьагъэх. Километри 3,8-рэ зэкIэмкIэ а чIыпIэм щагъэкIэжьыщт. ПстэумкIи сомэ миллион 41,9-рэ пэ­Iухьащт.

Лъэпкъ проектым къыдыхэлъытагъэу шъолъыр мэхьанэ зиIэхэ гъогухэу агъэцэкIэжьыхэрэм мы­жъокIэ-мастикэ зэхэлъыр зыхахьэрэ асфальт-бетон зэхэшIыхьагъэр милли­метрэ 15 хъоу тыралъхьанэу «Адыгеяавтодорым» къегъэнафэ. Гъогу­хэм ягъэцэкIэжьынкIэ тех­нологиякIэу щыIэхэм ар ащыщ, нахьыбэрэ мы­та­къоу асфальтыр телъыным фэIорышIэ.

— Шъолъыр мэхьанэ зиIэ гъогоу агъэцэкIэжьырэм псэупIэр зэпечы, со­циальнэ псэолъэ зэфэшъхьафэу Хьакурынэхьаблэ дэтхэм якIу. Арышъ, шапхъэхэм ади­штэу ар шIыгъэным мэхьанэ иI, — къыIуагъ Iоф­шIэнхэр языгъашIэрэ «Адыгеяавтодорым» илIыкIоу Роман Верзу­новым.

Мы тхьамафэм ыкIэм Хьакурынэхьаблэ икIэу къуаджэу Пщыжъхьаблэ кIорэ гъогум иIахь агъэцэкIэжьынэу рагъэжьэщт. Ар километри 2 пстэумкIи мэхъу, сомэ миллион 19,7-рэ пэIухьащт.

Къыхэгъэщыгъэн фаер, мы IофшIэнхэр къэкIощт 2022-рэ илъэсымкIэ агъэ­нэфэгъагъэхэм зэращыщ­хэр ары. ЗэкIэмкIи 2021-рэ илъэсым шъолъыр мэхьанэ зиIэ гъогу километри 10,96-рэ Шэуджэн районым щагъэцэкIэ­жьы­нэу щыт, сомэ миллиони 105,2-рэ атефэщт.

Республикэм игъогухэм ягъэцэкIэжьынкIэ агъэ­нэфагъэр пхырыщыгъэ зэрэхъурэм АР-м и ЛIы­шъхьэу КъумпIыл Мурат лъэшэу ынаIэ тет. Анахьэу къыхигъэщыхэрэр къоджэ псэу­пIэхэм ягъогухэу мэкъу­мэщ продукциер къызщыдагъэкIыхэрэм, социальнэ псэуалъэхэм якIухэрэр ары.