Нэфсэт исэнэхьаткIэ врач, илъэс зэкIэлъыкIохэм Адыгэ республикэ клиническэ сымэджэщым иврач шъхьаIэ игуа­дзэу Iоф ешIэ.

Сэ ар зэрэсшIэрэр иIофшIэн гуетыныгъэ фыриIэу, пшъэ­дэ­кIыжьэу иIэр икъоу къыгурыIоу, иамал къызэрихьэу цIыф-хэм IэпыIэгъу афэхъуным фэ­хьазыр бзылъфыгъэ гукъабзэу ары.

Непэ дунаир зэлъызыкIугъэ уз бзаджэм «ыгъа­хъэрэр», цIыфхэм ащ гу­мэкIыгъоу къафихьырэр зыфэдизыр дэгъоу Нэфсэт къыгурэIо, гухэкI нахь мы­шIэми, ежьыри коро­нави­русым ыгъэсымэ­джагъ, ащ икъиныгъо зэхишIагъ.

— Сысымэджэным ыпэ­кIэ, шъыпкъэр пIощтмэ, игъо сифагъэп вакцинэ зыхязгъэлъхьанэу, — еIо Нэфсэт. — Арэущтэу сыхэтызэ инфекцием сигъэсымэджагъ, ятIонэрэу ащ сырихьылIэнэу Тхьэм ерэмышI. Вакцинацием шапхъэу пылъхэмкIэ, узысымэджагъэм мэзих те­шIэн фае прививкэ ябгъэ­шIыным пае. Сэ чъэпы­огъум и 1-м ыуж вакцинэр зызыхяз­гъэлъхьан фаер. Щэч хэлъэп зэрязгъэшIыщтым, сэ сыврач, арышъ, зыми ыIорэм седэIунэу сыфаеп. Урысые вирусологием цыхьэ фэпшIынэу зэрэщытым джэнджэш фысиIэп. Къэбар нэпцIэу къекIокIыхэрэм уядэ­Iуныр хэукъоныгъ. Шъыпкъэ, вакцинацие зышIыгъэхэм ащыщ­хэри мэсымаджэх, ау нафэр зы — ащ зыпари илIыкIыгъэп.

ЖакIэмыкъо Аминэт.