Урысыем хэгъэгу кIоцI IофхэмкIэ и Министерствэ иотделэу Джэджэ районым щыIэм иполицие икъулыкъушIэ нэбгырищым яIэнатIэ къыз­фагъэфеди, гъэпцIагъэ зыхэлъ бзэджэшIагъэ зэрэзэрахьагъэм епхы­гъэу къызэIуахыгъэ Iофым изэхэфын ыкIэм фэкIуагъ.

ЩынэгъончъэнымкIэ федеральнэ къулыкъум и ГъэIоры­шIапIэу Адыгэ Республикэм щыIэмрэ АР-м хэгъэгу кIоцI Iоф­хэмкIэ и Министерствэ щы­нэгъончъэнымкIэ иподразде­лениерэ зэгъусэхэу зэрахьэгъэ оперативнэ-лъыхъон Iоф­тхьабзэхэм къакIэлъыкIоу мы нэбгырищым алъэныкъокIэ уго­ловнэ Iоф къызэIуахыгъ.

Зэхэфыным зэрэщагъэунэфыгъэмкIэ, 2020-рэ илъэсым тыгъэгъазэм и 25-м къыщегъэ­жьагъэу 2021-рэ илъэсым мэзаем и 21-м нэс лажьэ зиIэу агъэунэфыгъэ полицейскэм язым ышIэзэ ятэ исчет илъ ахъщэу сомэ мин 37-рэ хъурэр бзылъфыгъэ горэм икартэ фыригъэхьагъ. Бзылъфыгъэм сомэ мин 37-р социальнэ тынэу къыфырагъэхьагъэу ылъыти, ахъщэр къырихыгъ ыкIи зыфаем пэIуигъэхьагъ. Нэужым полицием иIофышIэхэу агъэмысэхэрэм бзылъфыгъэр агъэпцIэнышъ, ахъщэр на­хьыбэу къырагъэтыжьын гухэлъ яIэу, гъэтхапэм ар поли­цием иотделэу Джэджэ районым щыIэм къырагъэблэгъагъ. Бзылъфыгъэм исчет илъыгъэ сомэ мин 37-р хэбзэнчъэу зэригъэфедагъэм пае уголовнэ Iоф къыфызэIуахынэу раIуи агъэщынагъ.

Нэужым бзылъфыгъэр амыгъэпщынэным пае сомэ мин 37-р зыем икартэ фыригъэ­хьажьын ыкIи къуалъхьэу сомэ мин 50 къаритын фаеу гурагъэIуагъ.

2021-рэ илъэсым мэлылъ­фэгъум и 21-м полицием иIофы­шIэщтыгъэхэр къулыкъушIэ ма­шинэм исхэу бзылъфыгъэм сомэ мин 87-р къыIахыжьынэу ар зыщыпсэурэ Мыекъопэ районым ит къутырэу Советскэм кIуагъэх. Щынэгъон­чъэнымкIэ федеральнэ къулыкъум и ГъэIорышIапIэу Адыгэ Республикэм щыIэмрэ АР-м хэгъэгу кIоцI IофхэмкIэ и Министерствэ щынэгъончъэнымкIэ иподразделениерэ макъэ зэ­раригъэIугъэм тетэу полицием иIофышIэ нэбгырищыр а чIыпIэм щаубытыгъ.

Мы уахътэм ехъулIэу лажьэ зиIэхэр агъэтIысыгъэх. Ахэм уголовнэ Iофэу къафызэIуахыгъэр хьыкумым фагъэхьыгъ.