ШышъхьэIум и 23 – 29-м я VII-рэ Дунэе дзэ-техническэ форумэу «Армия-2021» зыфиIорэр Урысыем зэрэщыкIогъэ шIыкIэм тигъэгушхуагъ.

Урысые Федерацием и Президентэу Владимир Путиным зэхахьэм къызэрэщиIуагъэу, ти УIэшыгъэ КIуачIэхэм джырэ лъэхъан лъэкIэу яIэр форумым къегъэлъагъо.

Мыекъуапэ и Гупчэ мемориал щыкIогъэ Iофтхьабзэм Адыгэ Республикэм и ЛIышъхьэу Къум­пIыл Мурат къызыщэгущыIэм, дунаир щынэгъончъэу щытыным фэшI тизыкIыныгъэ дгъэпытэным форумэу «Армия-2021» зыфи­Iорэр зэрэфэгъэхьыгъэр къыхигъэщыгъ.

Хэгъэгу зэошхом илъэхъан фашист техакIохэм ядзэхэр зэхэкъутэгъэнхэм, Адыгеим ифыжьыгъэнхэм Молдавием ия 95-рэ шхончэо дивизие пхъашэу хэлэжьагъ. 1943-рэ илъэсым Мыекъуапэ шъхьафит шIыжьыгъэным хэлэжьэгъэ дивизием ибыракъ Адыгеим июнармейцэхэм къаратыжьыгъ.

Адыгэ Республикэм и Лъэпкъ музей быракъыр зэрэчIэлъыщтыр ти ЛIышъхьэу КъумпIыл Мурат зэIукIэм къыщиIуагъ. Дзэ гарнизонэу Мыекъуапэ щыIэм хэтхэр форумым чанэу зэрэхэлэжьагъэ­хэм фэшI КъумпIыл Мурат зэрафэразэр игущыIэ къыщыхигъэ­щыгъ.

Къэгъэлъэгъонхэм уагъэгъуазэ

Республикэм и Парламент, Правительствэм япащэхэр, хэбзэ къулыкъушIэхэр, дзэм иветеранхэр, общественнэ организациехэм ахэтхэр, юнармейцэхэр, кIэлэеджакIохэр, нэмыкIхэр Iоф­тхьабзэм хэлэжьагъэх. Ти УIэшыгъэ КIуачIэхэм ятехникэу Мыекъуапэ и Гупчэ мемориал къыщагъэлъагъорэм еплъыгъэх.

Танкхэр, машинэхэр, топхэр, фэшъхьафхэри лъэгъупхъэх. КIэ­лэцIыкIухэр, ныбжьыкIэхэр танк­хэм арытIысхьанхэр, офицерхэр, дзэкIолIхэр упчIэжьэгъу ашIынхэр нахь ашIогъэшIэгъоныгъ.

НыбжьыкIэхэм гуапэ ащы­хъугъ Адыгэ Республикэм иветеранхэм я Совет итхьаматэу Къуаджэ Аслъан зэгъэпшэнхэр ышIыхэзэ техникэм ехьылIэгъэ къэбархэр къызэриIотагъэхэр.

Гупчэ мемориалым титэу самолет лъэпкъ зэфэшъхьафхэр огу къаргъом къибыбагъэх, чIым нахь пэблагъэ зыкъашIызэ, лъхъан­чэу быбыгъэх. УIэшыгъэ КIуачIэхэм лъэкIэу яIэр летчик­хэм къагъэлъэгъуагъэу плъытэ хъущт.

ДзэкIолI бэнакIохэр

Спортым пыщагъэхэм бэнапIэхэр къафызэIуахыгъэх. Мые­къопэ гарнизоным икъулыкъушIэ­хэм самбэмкIэ ибэнакIохэм яIэпэIэсэныгъэ алырэгъум къыщагъэлъэгъуагъ. Урысыем и Къэ­ралыгъо Думэ идепутатэу Хьасаныкъо Мурат гущыIэгъу фэхъугъэх.

Дзэм испорт лъэпкъэу IэкIэ зэбэныхэзэ пхъашэу зэпэуцу­жьыхэрэ дзэкIолIхэм ясэнаущыгъэ уеплъынкIэ гъэшIэгъоныгъэ.

— Мыекъопэ бэнэпIэ еджапIэм щагъэсагъэхэ кIалэхэу дзэм къулыкъур щызыхьыхэрэм якъэ­гъэлъэгъонхэр арых алырэгъум щышъулъэгъухэрэр, — къыщи­Iуагъ зэхахьэм Урысыем, Адыгеим язаслуженнэ тренерэу, Адыгэ Республикэм испорт еджа­пIэу 2-м ипащэу Хъот Юныс. – КIуачIэр апсыхьэ, якъулай хагъахъо.

ДзэкIолI бэнакIохэм якъэгъэлъэгъонхэм яплъыгъэх КъумпIыл Мурат, Владимир Нарожнэр, Геннадий Митрофановыр, нэ­мыкI хэбзэ къулыкъушIэхэр, спортым пыщагъэхэр.

Рэхьатныгъэм иухъумакIох

Мэфэ заулэм кIогъэ къэгъэлъэгъонхэм тяплъызэ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр гущы­Iэгъу тыфэхъугъ.

— Лъэпкъ зэфэшъхьафхэр, ныбжьыкIэхэр ягуапэу зэхахьэм хэлажьэх, — къеIуатэ Шъхьэлэхъо Аскэр. – АмышIэрэм къы­кIэупчIэх, танкхэм, нэмыкI­хэм яуцуалIэхэзэ нэпэеплъ су­рэтхэр атырахых. Хэгъэгу зэошхом илъэхъан лъэпкъхэр пытэу зэ­къоу­цохи ТекIоныгъэр къызэрэ­дахыгъэр егъашIи тарихъым хэкIокIэщтэп, ныбжьыкIэ шIагъо­хэр тиIэх.

Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ къытиIуагъ патриотическэ пIуныгъэм фэгъэ­хьыгъэ орэдхэр, театрализованнэ едзыгъохэр кIэлэеджакIохэм яансамблэхэм зэрагъэшIэнхэм зэрэпылъхэр.

Ти УIэшыгъэ КIуачIэхэр мамыр щыIакIэм, рэхьатныгъэм яухъумакIох. Юнармейцэхэр непэ кIэлэеджакIох. Уахътэр лъыкIуатэу аныбжьыкIэ къатефэмэ, кIалэхэр дзэм къулыкъушIэ кIощтых, япшъэрылъхэр дэгъоу агъэцэкIэщтых.

ЛIэужхэр зэрапхы

Республикэ общественнэ движениеу «Адыгэ Хасэм» ихэ­сашъхьэ хэтхэу Тэу Аслъан, Хъот Юныс, Къуижъ Къэплъан, ЦIыкIушъо Аслъан, Тхьапшъэкъо Альберт форумэу «Армия-2021» зыфиIорэм чанэу хэлэжьагъэх. ЛIэужхэм язэпхыныгъэхэр гъэпытэгъэнхэм, шIэжь яIэу ныбжьыкIэхэр пIугъэнхэм, нэмыкI­хэм яхьылIэгъэ зэхахьэхэр тапэкIи зэхащэщтых.

Хъот Юныс кIэщакIо фэхъуи, адыгэ бэнакIэмкIэ зэнэкъокъу гъэшIэгъон Мыекъуапэ щыкIуагъ. Адыгеим щыщхэм ямызакъоу, Къыблэм, Темыр Кавказым къарыкIыгъэхэр алырэгъум щыбэнагъэх.

Шы спортымкIэ Тхьапшъэкъо Альберт зэхищэхэрэ зэIукIэгъу­хэм хэгъэгу ыкIи дунэе мэхьанэ яIэ хъугъэ, ащ ехьылIэгъэ зэфэхьысыжьхэр Адыгэ Хасэм ышIыгъэх, дзэм кIощт кIалэхэм Iофэу адашIэщтым тегущыIагъэх.

Опсэу, форумэу «Армия-2021» зыфиIорэр. О уилъэгапIэхэм ныбжьыкIэхэр, дзэм икъулыкъу­шIэхэр афэкIох.

ЕмтIылъ Нурбый.