«НахьыпэкIэ хъугъа­гъэм зыщыбгъэгъозэн закъом паеп тарихъыр зэбгъэшIэным мэхьанэу иIэр. Непэ псэукIэ амалэу тиIэр зыфэдэр, неущ къытэрыкIощтыр къыд­гурыIоным фэшI тиблэ­кIыгъэ зэдгъэшIэн фае», — къыIуагъ УФ-м и Президентэу Владимир Путиным шIэныгъэм и Мафэ Владивосток щыIэу олимпиадэхэм, зэнэкъокъухэм текIоныгъэ къащыдэзыхыгъэ кIэлэеджакIохэм за­Iо­кIэм.

ТхьамыкIагъоу блэкIыгъэ лъэхъаным къыхэфагъэхэр ащ нахьыбэрэ цIыф лъэпкъым ыпэ къимыкIыжьынхэм пае тарихъым хэшIыкI фыриIэныр шIокI зимыIэ Iофэу елъытэ къэралыгъом ипащэ. 1917-рэ илъэсым революциеу щыIагъэм ыуж Урысыем империем итетыгъо зэриухы­гъэр, чIэнэгъэшхохэр зэришIыгъагъэхэр, нэужым къинэу зэрэзэтеуцожьы­гъагъэр, Советскэ Союзыр зэрэзэхэтэкъугъэр агу къы­­гъэкIыжьыгъ, а хъу­гъэ-шIагъэхэр къыхэмыхьа­гъэхэмэ, тикъэралыгъо нэмыкIэу зэрэпсэущтгъагъэр къыхигъэщыгъ.

«Тарихъым анахь шъхьа­Iэу къыхэнагъэхэм ащыщ Хэгъэгу зэошхом ТекIоныгъэу советскэ цIыфхэм къыщыдахы­гъэр. Ары мыхъугъэемэ, дунаир нэмыкI шъыпкъэ­щтыгъ, лъэпкъ зэфэшъхьафыбэу тихэгъэгу исмэ ящыIэныгъи нэмыкIы­щтыгъ. Зыпари щыIакIэ яIэщтгъагъэп пIомэ нахь тэрэз. Ар зыпарэкIи тщы­гъупшэ хъущтэп. Ленинград тыфэмыбанэу яттыгъэмэ нахьышIугъэу, нахь макIэу хэкIодэщтгъагъэу зыIохэрэм тядэIу хъущтэп. ХэкIуадэрэр нахь мэкIэни, ау шъо шъущы­Iэщтгъагъэп», — къыIуагъ Владимир Путиным.