Зэтыгъо ахъщэ IэпыIэгъур къафэкIощт
УФ-м и Президент иунашъоу шышъхьэIум и 24-м къыдэкIыгъэм тетэу, пенсие къызыфакIоу къэралыгъом исхэм зэкIэми 2021-рэ илъэсым иIоныгъо мазэ сомэ мин пшIырыпшI зэтыгъоу УФ-м ПенсиехэмкIэ ифонд афитIупщыщт.
Ахъщэ тедзэр УФ-м игражданинэу 2021-рэ илъэсым ишышъхьэIу и 31-м нэс пенсиер зыфагъэнэфагъэхэм зэкIэми атефэ. IофшIапIэм Iутыми, Iумытыжьхэми зыпарэкIи ащ епхыгъэп.
УФ-м ПенсиехэмкIэ ифонди, УIэшыгъэ КIуачIэхэм ахэхьэрэ ведомствэми пенсие къызэритыхэрэм зэтыгъо ахъщэу сомэ мини 10 къафэкIощтыр.
Фондым тхылъэу IэкIэлъхэм къапкъырыкIызэ ар зэкIэмэ афитIупщыщт. Пенсиер цIыфым къызэрэIэкIэхьэрэ шIыкIэ дэдэм тетэу ари къатыщт.
УФ-м ПенсиехэмкIэ ифонд ичIыпIэ органэу АР-м щыIэхэм пенсие къызыфакIоу Адыгеим ис нэбгырэ 123007-мэ афитIупщыгъах ыкIи ар аIэкIэзыгъэхьащт организациехэм тхылъхэр афигъэкIуагъэх.
Банкым счетэу щыриIэмкIэ пенсиер къызIэкIахьэхэрэм Iоныгъом и 2-м зэтыгъо ахъщэ тыныр картэхэм къафихьагъ. Ар зэкIэ къызэратыщтхэм япроцент 59-р ары. ПочтэмкIэ е ООО-у «Центр доставки пенсии» зыфиIорэмкIэ къызIэкIахьэхэрэм пенсиер къазыфэкIорэ мафэм ахъщэ тынри къаратыщт.
ЗыгорэкIэ ушъхьагъу горэ иIэу пенсионерым сомэ мини 10-р мы мазэм къыIэкIэмыхьагъэмэ, къыкIэлъыкIорэм къыратыщт.
ЦIыфым нэмыкI къэралыгъо IэпыIэгъу горэ ыгъэпсын фаеу хъугъэми, гъотэу иIэр къызалъытэкIэ мыр хагъэхьащтэп. Джащ фэдэу чIыфэу телъым пае хьыкум приставхэм мы ахъщэр аубытын фитхэп.
УФ-м ПенсиехэмкIэ ифонд и Къутамэу АР-м щыIэм ипресс-къулыкъу.