Мыекъопэ районым ит поселкэу Меркулаевкэм щыпсэухэрэм медицинэ IэпыIэгъум ылъэныкъокIэ Iофыгъоу яIагъэхэм ядэгъэзыжьынкIэ Урысые народнэ фронтым ишъолъыр къутамэу АР-м щыIэм хэтхэр IэпыIэгъу афэхъугъэх.

УФ-м и Президентэу, ОНФ-м ипащэу Владимир Путиным «линие занкIэр» зеIэм поселкэм дэсхэм зыфагъэзэгъагъ. Ягъогухэр зэрэдэйхэр, Интернетыр, зэпхыныгъэ амалхэр икъоу зэранэмысыхэрэр ары къэралыгъом ипащэ лъагъэIэсыгъэр. Народнэ фронтым хэтхэр зэ­кIохэм, ахэм анэмыкI Iофыгъо­хэри зэряIэхэр нэрылъэгъу къафэхъугъ.

— Медицинэ IэпыIэгъум ылъэныкъокIи Меркулаевкэм щыпсэухэрэм гумэкIыгъохэр яIэх. Поселкэм дэсыр зэрэмакIэм фэшI, пстэумкIи нэбгырэ 45-рэ ныIэп, ФАП дэтэп. Зэпахырэ узэу дунаир зэлъы­зыкIугъэм ыпкъ къикIыкIэ псэупIэхэр къэзыкIухьэрэ «мобильнэ ФАП-м» мы уахътэм Iоф ышIэрэп. Уц щапIэ дэтэп. IэпыIэгъу зищыкIагъэр нахь къапэблэгъэ псэупIэу Усть-Сахрай е поселкэу Каменномостскэм кIон фаеу мэхъу, — къыIотагъ ОНФ-м ишъолъыр къутамэ итхьамэтэ гуадзэу Александр Колесниковым.

ЗэIукIэгъоу поселкэм дэсхэм адашIыгъэм ыуж Мыекъопэ район сымэджэщым иврач шъхьа­Iэ къыхагъэлажьэзэ медицинэ IэпыIэгъум ылъэныкъокIэ гумэкIыгъохэм хэкIыпIэ къафагъотыгъ. ШышъхьэIу мазэм медицинскэ комплексэу псэупIэхэр къэзыкIухьэхэрэр Меркулаевкэм щыIагъ. Джы ар мазэм зэ мы псэупIэм кIощт. ЦIыфхэм социальнэ фэIо-фашIэхэр афэгъэцэкIэгъэнхэмкIэ Комитетым поселкэм дэсхэм япсауныгъэ изытет ауплъэкIуным пае район сымэджэщым къэзыщэщтхэ ыкIи зыщэжьыщтхэ автомашинэ къаритыгъ. Вакцинацием ылъэныкъокIэ Iофыгъоу къаIэтыгъагъэхэри зэшIохыгъэ хъугъэх.

— ЦIыфэу къэралыгъом ипащэ зыфэзыгъэзагъэ пэпчъ игумэкIыгъо дэгъэзыжьыгъэным тыпылъ. Общественникхэри, хэбзэ органхэри, цIыфэу республикэм исхэри зэдеIэжьхэмэ, зэшIохыгъэ хъущтыр нахьыб. Мары мы поселкэм медицинэ IэпыIэ­гъум ылъэныкъокIэ Iофыгъоу яIагъэхэм зэкIэми хэкIыпIэ къафэдгъотыгъ. НэмыкIэу зыгъэгумэкIыхэрэри охътэ благъэм дэгъэзыжьыгъэ хъущт, — къыIуагъ ОНФ-м ишъолъыр къутамэу АР-м щыIэм ипащэу Юрий Гороховым.