Iоныгъо мазэм кIэу къыздихьыгъэхэр
Ахъщэ IэпыIэгъур
УФ-м и Президентэу Владимир Путиныр кIэщакIо фэхъугъэу пенсие къызыфакIоу къэралыгъом исхэм зэтыгъо ахъщэ IэпыIэгъоу сомэ мин пшIырыпшI мазэу къихьагъэм афатIупщыщт.
Ащ фэгъэхьыгъэ унашъом Президентыр шышъхьэIум и 24-м кIэтхагъ. Ахъщэр къызтефэхэрэм ащ пае лъэIу тхылъ атын ищыкIагъэп, ПенсиехэмкIэ фондым испециалистхэм зэкIэри агъэпсыщт. Мы IэпыIэгъур зэратыщтхэм сэкъатныгъэ зэриIэм е унагъор зыIыгъыгъэр дунаим зэрехыжьыгъэм афэшI пенсие зыфагъэуцугъэхэри къыхеубытэх.
НэмыкIэу къалъытэщт
КIэлэцIыкIоу зыныбжь илъэси 7-м шIомыкIыгъэр къэсымэджагъэу, ащ зэрэлъыплъэщтым пае ныр е тыр IофшIапIэм къыIукIыгъэмэ, «больничнэхэр» джы нэмыкIэу къафалъытэщтых. Ащ фэгъэхьыгъэ законым Iоныгъо мазэм и 1-м къыщыублагъэу кIуачIэ иIэ хъугъэ.
Джы лэжьапкIэу иIэр гурытымкIэ лъытагъэу зэрэхъурэм фэдиз къатыщтыр. КIэлэцIыкIур сымэджэщым чIэлъыгъэмэ е ащ унэм щеIэзагъэхэмэ ар зыпарэкIи епхыгъэщтэп. Законым къызэрэщыдэлъытагъэмкIэ, федеральнэ бюджетым къыхэхыгъэ ахъщ ащ пэIуагъэхьащтыр. «Больничнэ» щыIэм зы мафэр анахьыбэу сомэ 2434-рэ къызэрэфалъытэщтыр.
Къэралыгъо фэIо-фашIэхэм япортал агъэфедэзэ
ГъогурыкIоным лъыплъэрэ видеокамерэм къыгъэлъэгъуагъэм къыпкъырыкIыхэзэ автомобилистым тазырэу тыралъхьагъэм дыримыгъаштэрэмэ, ащ пае тхьаусыхэ тхылъыр къэралыгъо фэIо-фашIэхэм япортал е хьыкумым иинтернет нэкIубгъо щитын ылъэкIынэу Iоныгъом и 1-м къыщыублагъэу фитыныгъэ иIэ хъугъэ. НахьыпэкIэ а тхылъыр ГИБДД-м щитын фэягъ.
«Гаражхэм яамнистие»
Гараж зиIэхэм ар зытет къэралыгъо е муниципальнэ чIыгу Iахьыр ыпкIэ хэмылъэу зытыратхэжьынэу фитыныгъэ къязытырэ законым 2026-рэ илъэсым иIоныгъо и 1-м нэс кIуачIэ иIэнэу ашIыгъ. Ар къызщиIорэ унашъоу тызхэт илъэсым иIоныгъо и 1-м агъэцэкIэнэу аублагъэм зэрэщыгъэнэфагъэмкIэ, гаражыр псэолъэшIыным ишапхъэхэм адиштэу гъэуцугъэмэ, зытетыр къэралыгъо е муниципальнэ чIыгумэ ыкIи 2004-рэ илъэсым итыгъэгъазэ и 31-м ыпэкIэ ашIыгъэу щытымэ ары мы унашъом къызхиубытэрэр.
Iэзэгъу уцхэм ящэн
Iоныгъом и 1-м къыщегъэжьагъэу уц щапIэ зиIэхэм зэкIэми Интернетыр (маркетплейс) агъэфедэзэ Iэзэгъу уцхэр IуагъэкIынхэу фитыныгъэ къаратыгъ. НахьыпэкIэ ащ фэдэ амал зиIагъэхэр аптекипшIым къыщымыкIэу зыгъэлажьэхэрэр ары.
Ахъщэ зэрылъ джэгукIэхэр
Мазэу тызхэхьагъэм ахъщэ зэрылъ джэгукIэхэм я ЗыкI регулятор щыIэ хъущт. Хэбзэнчъэу Интернетым зиIофшIэн щызэхэзыщэрэ букмекерхэм якъычIэгъэщын, Урысыем спортымкIэ ифедерациерэ спорт лигэхэмрэ ахъщэ зэрылъ джэгукIэхэм язэхэщакIохэм къалэжьыгъэм хаубытыкIырэр зыдагъакIорэм лъыплъэгъэныр ары ащ пшъэрылъ шъхьаIэу иIэщтыр. Законым къызэрэщыдэлъытагъэмкIэ, чIыфэ зытырэ организациер къыздыригъаIэзэ ахъщэ зэрылъ джэгукIэхэмкIэ зэнэкъокъу зэхэзыщэмэ зышIоигъор регуляторым исистемэ хэхьан фае.
Программэм ипIалъэ лъагъэкIотагъ
Унагъохэм фэгъэкIотэнхэр къыздэлъытэгъэ ипотекэр агъэфедэзэ псэукIэ амалхэр нахьышIу ашIынхэмкIэ программэм пIалъэу иIэр 2023-рэ илъэсым итыгъэгъазэ и 31-м нэс зэрэлъагъэкIуатэрэм фэгъэхьыгъэ унашъом Iоныгъом и 2-м кIуачIэ иIэ хъугъэ. Ащ имызакъоу, кIэлэцIыкIу зэрыс унагъохэм ащ фэдэ ипотекэу аратыщтым къэралыгъом пэIуигъэхьащтыр сомэ миллиардрэ миллион 685-м нигъэсыгъ. Ащ ыпэкIэ миллион 800 хъущтыгъэ.
Электроннэ шIыкIэм тетэу
Сэкъатныгъэ зиIэхэм электроннэ шIыкIэм тетэу гъэпсыгъэ сертификатхэр ашIынхэ амал Iоныгъом и 26-м къыщыублагъэу яIэ мэхъу. АхэмкIэ фэIо-фэшIэ зэфэшъхьафхэм апкIэ атын, ящыкIэгъэ товарыр къащэфын фитых. УФ-м и Правительствэ унашъоу ышIыгъэм зэритхагъэмкIэ, заом сэкъатныгъэ хэзыхыгъэхэм, Хэгъэгу зэошхом хэлэжьагъэхэм, зэо-зэпэуцужьхэм яветеранхэм, нэмыкIэу къэралыгъо социальнэ IэпыIэгъу зэратыхэрэм зэкIэми а сертификатыр агъэфедэзэ протезхэр, курэжъыехэр, нэмыкIэу ящыкIагъэхэр къащэфынхэ алъэкIыщт.
НэкIубгъор зыгъэхьазырыгъэр
ХЪУТ Нэфсэт.