Адыгеим и ЛIышъхьэу КъумпIыл Мурат псэу­пIэу Ханскэм зыщэIэм ащ щыпсэухэрэм «линие занкIэм» илъэхъан къаIэтыгъэгъэ Iофыгъо­хэм атегущыIагъэх.

А зэдэгущыIэгъум хэлэжьа­гъэх федеральнэ инспектор шъхьаIэу Сергей Дрокиныр, Адыгэ Республикэм и Премь­ер-министрэу Геннадий Митрофановыр, Урысые Федерацием и Къэралыгъо Думэ Адыгеим ыцIэкIэ идепутатэу Хьасанэкъо Мурат, министерствэхэмрэ Мые­къуапэ имэриерэ ялIыкIохэр.

Ханскэм щыпсэухэрэм яIофыгъохэр общественнэ мэхьанэ зиIэ ыкIи унэе гумэкIыгъохэм япхыгъэхэу щытых. ГущыIэм пае, губгъо гъогухэм, ощхыпс ры­кIуапIэхэр зэрэщымыIэхэм къы­хэкIэу урам заулэмэ уащызе­кIожьын умылъэкIыным нэсэу псыр зэратеуцорэм ыкIи нэ­мыкIхэм япхыгъэхэр.

Адыгэ Республикэм и ЛIы­шъхьэ къызэриIуагъэмкIэ, псэу­пIэм пхырыкIырэ гъогухэм ащыщхэу зигугъу къашIыгъэхэр муниципальнэ администрацием иIофышIэхэм ауплъэкIущтых, ащ нэужым чэзыу-чэзыоу гъэцэ­кIэжьынхэр арашIылIэщтых. Мы илъэсым къалэу Мыекъуапэ (псэупIэу Ханскэри ащ хэхьэ) со­мэ миллион 35-рэ фэдиз къы­фыхагъэкIы мыжъо-пшэхъо зэ­хэлъ зытелъ автомобиль гъогу километрэ 50 фэдизмэ ягъэцэкIэжьын пэIуагъэхьанэу.

Ащ нэмыкIэу республикэ ыкIи федеральнэ гъогухэм ащыщхэм лъэсрыкIохэм апае зэпырыкIыпIэхэр зэрямыIэхэр, урамхэр икъоу къызэрамыгъэнэфхэрэр зыгъэгумэкIыхэрэ Iофыгъохэм ащыщых. КъумпIыл Мурат къызэриIуагъэмкIэ, игъоу алъэгъугъэ Iофыгъохэм ахэплъэщтых ыкIи ахэмкIэ унэшъо гъэнэфагъэхэр аштэщтых.

ЦIыфхэм къаIэтыгъэ Iофы­гъохэм ащыщ электричествэм зэпыугъохэр зэрэфэхъухэрэр. Ханскэм щыпсэухэрэр тхьаусыхагъэх бэрэ светыр къызэрэ­кIуасэрэм ыкIи напряжением къызэрэкIичырэм апае. Мыщ дэжьым къэIогъэн фае энер­гием епхыгъэ компаниер Мые­къопэ районымкIэ псэупIэу Тульскэм зэрэдэтыр, ащ къыхэкIэу цIыф­хэр бэрэ ащ кIонхэ фаеу зэрэ­хъурэр къин къызэращыхъурэр, анахьэу етIани хэкIотагъэхэмрэ сэкъатныгъэ зиIэхэмрэ.

Мы зэIкIэгъум щыIэгъэ Маг­де­ев Рустам — ПАО-у «Рос­сети Кубань» икъутамэу Адыгэ электрическэ сетьхэмкIэ пащэу щы­тым ышъхьэкIэ а Iофыгъом ынаIэ тыригъэтынэу Адыгеим и ЛIы­шъхьэ пшъэрылъ къыфишIыгъ.

Ахэм анэмыкIэу сабыибэ зэ­рыс унагъохэм чIыгу Iахьхэр къаратынхэм, диабет зиIэ кIэлэцIыкIухэм ыпкIэ хэмылъэу Iэзэгъу уцхэр аIэкIэгъэхьэнхэм, чIыпIэхэр зэтегъэпсыхьэгъэнхэм, кIэлэцIыкIухэр зыщыджэгущтхэ ыкIи спортым зыщыпылъыщтхэ чIыпIэхэр шIыгъэнхэм, нэ­мыкIхэми япхыгъэ Iофыгъохэр къаIэтыгъэх.

ЗэIукIэгъум икIэуххэр зэфи­хьысыжьхэзэ Адыгеим и ЛIы­шъхьэ къызэрэхигъэщыгъэмкIэ, Iофыгъохэу зыгъэгумэкIыхэрэм ахэплъэщтых, цIыфхэм ящыIакIэ нахьышIу шIыгъэным пае ищыкIэ­гъэ Iофтхьабзэхэр зэрахьащтых.

«ПсэупIэу Ханскэр хэхъоныгъэ зышIырэ ыкIи гугъапIэхэр зэтпхыхэрэ чIыпIэу щыт. Ащ щы­псэухэрэм ящыIакIэ нахьышIу шIыгъэным пае Iофтхьэбзэ гъэ­нэфагъэхэр зетэхьэх. Нэбгырэ 250-рэ зычIэфэщт еджапIэр, кIэлэцIыкIу 240-мэ ателъытэгъэ IыгъыпIэр дгъэпсыгъэх, искусст­вэхэмкIэ еджапIэр тэгъэцэкIэ­жьы. Шъори шъуишIуагъэ къэ­жъу­гъэкIонэу тышъущэгугъы: шэмбэт шIыхьафхэр зэхашъущэх, гъогухэм ягъэцэкIэжьын, социальнэ псэуалъэхэм яшIын зэ-­рэ­кIорэм шъунаIэ атежъугъэт. Гъэ­псын Iфхэр ыпэкIэ лъыдгъэ­кIотэнхэм пае цIыфхэм акIуачIэ зэхалъхьан, зэдэIэпыIэжьынхэ фае», — къыIуагъ Адыгеим и ЛIышъхьэ.

АР-м и ЛIышъхьэ ипресс-къулыкъу